ORANJESTAD (AAN): Diasabra atardi, un area toch relativamente basta grandi di Aruba a keda sin coriente.
Esey a socede banda di 3:35 pm di atardi. Coriente a bay na algun area di Oranjestad, como tambe algun parti di Santa Cruz, parti di Balashi, Pos Chikito, parti di Paradera, parti di Tanki Leendert, parti di Palm Beach, Bubali tambe.
Coriente a laga Centro Deportivo Betico Croes tambe den scuridad, y DVG no por a sigui duna vacuna, y a cera su portanan mas trempan.
Segun un informe di NV Elmar, e interupcion di coriente aki a wordo causa door di un fayo na WEB Aruba NV. Esey a pone cu mesora a desconecta un kabel principal di coriente afo pa evita cu e ta afecta henter e planta. Banda di 4:37 pm, WEB Aruba NV a anuncia cu a soluciona e problema, y ta cuminza duna coriente bek.
Asina coriente a bin bek na varios di e areanan aki, y e tabata ser haci segun schedule pe reconeccion.
Banda di 6 pm, e compania di WEB Aruba NV a indica cu nan tecniconan a resolve e problema y cu pa e ora ey ya tur bario a wordo reconecta.
Debi na e fayo aki, algun bario cu si a keda cu coriente, lamentablemente a keda sin CableTV y tambe CableInternet. Esey ta debi cu algun caminda, e amplifiernan a keda sin coriente y no tabata procesa e señalnan.
