ORANJESTAD (AAN) – Minister di Husticia mr. Andin Bikker a recorda, den conferencia di prensa, cu ora e gabinete Wever-Croes a sinta na 2017,
a haya un Bestuurskantoor completamente bashi, sin computer y cashinan bashi, y unico cos cu nan a haya ta problema.
Bikker a subraya cu aworaki e gobierno saliente no ta bay ripiti esey, y e mes ta trahando for di tres siman pasa, diariamente, riba un 'overdrachtsdossier' di Gabinete Wever- Croes, unda ta bay indica tur e plannan cu nan trahando.
Di su banda el a pidi tur e dienstnan cu ta regarda su cartera pa nan dune un update di kico ta nan deseonan y e cosnan urgente cu mester worde atendi, pa ora su sucesor drenta como Minister di Husticia e ta haya tur cos na ordo. E ta bay haya un dossier activo unda e sa précis kico ta andando, y stuknan unda e lo sa precisamente kico a logra y kico ta pendiente, ademas di full un relato di recomendacion di su experiencia y obviamente, kico ta e asuntonan di mas urgente cu tin cu atende den tur e dienstnan concerni.
El a remarca cu esaki ta hopi importante pasobra e gobierno anterior a experiencie di un manera hopi fastioso, cu no a haya un traspaso di funcionnan ordena, y pa cosnan urgente mester a pidi cada bez un dienst pa haya un copia di documento, y tur esaki ta trece tardanza di restart di e gobierno, y esaki ta hopi lamentable pasobra esun cu ta worde perhudica ta Pais Aruba. Gabinete Wever-Croes a subraya cu nan ta bay haci 'overdrachtdossier' y Minister Bikker mes ta trahando riba esey.
