Vacunathon Youth Edition - ORANJESTAD (AAN): Despues cu Aruba a haya e OK for di Hulanda, a cuminza vacuna muchanan di 12 aña bay ariba tambe, contra COVID-19.
Awe na Centro Libertador Betico Croes ta bay tuma lugar e asina yama Vacunathon Youth Edition, unda cu di 9’or di mainta te cu 4’or di atardi hobennan di 12 pariba por tuma nan vacuna, pero adultonan cu no a vacuna ainda tambe por wordo vacuna.
Durante un conferencia di prensa Diabierna, Dr. Wilmer Salazar di DVG a duna un splicacion riba motibonan dicon e hobennan tambe mester ricibi nan vacuna contra e virus.
El a splica cu mundialmente ta wordo raporta cu e edad di esnan cu ta haya COVID-19 ta bahando.
“Anteriormente tabata asina cu mayor parti di esnan cu tabata haya problemanan serio debi na Coronavirus tabata di edad avanza, pero aworaki tin un aumento basta drastico mundialmente, di hobennan di 12 aña bay ariba cu ta creando un situacion bastante preocupante”.
Bo ta wak mas caso di hospitalizacion bao di hobennan, consecuencianan negativo pa salud y te hasta morto, segun Salazar.
E docter a sigui bisa cu esey muy probablemente tin di haber cu e diferente variantenan nobo cu tin aworaki, cu ta afectando esnan cu ainda no a wordo vacuna y mas ta wordo afecta pues pa e virus y haya un complicacion.
“Antes esnan di menor di edad di 20 no tabata keda cu problema di salud, pero aworaki ta nota cu esnan cu haya e virus y ta haya tiki sintoma of no ta haya sintoma, por haya consecuencianan mas lat”.
Esey kiermen cu e persona por keda cu algun problema di salud, cu lo por crea limitacionnan den su bida diario, segun Salazar.
El a splica cu mirando esaki Pfizer a haci un estudio, pa wak kico e efecto di proteccion y seguridad ta di un vacuna pa muchanan di 12 aña bay ariba.
“E resultado tabata extraordinario, pasobra nan a logra proteha e muchanan contra COVID-19 y a evita complicacionnan grave y morto”.
Pesey uso di e vacuna aki a wordo autoriza pa diferente autoridad y instancia mundial, segun e docter di DVG.
El a splica cu e vacuna ta importante tambe pa e mucha of hoben cu tin algun problema di salud caba manera obesidad, asthma , problema di curazon, diabetis etc.
Specialmente mirando e variante nobo, Delta, ta esencial pa hobennan tambe tuma e vacuna.
