Investigacionnan di DIARIO ta revela varios factor cu ta hunga un papel - *Toque de Queda tabata stroba actividadnan ilegal nocturno cu ta produci placa - *Agitacion politico ta crea intrankilidad y ta fomenta agresividad cerca poblacion
ORANJESTAD (AAN) — Dos desaroyo na entrada di fin di siman, sigur ta contribui na mas trankilidad cerca publacion di Aruba.
Informacionnan cu DIARIO a ricibi durante ultimo simannan tabata indica cu un parti importante di comunidad ta conoce un grado halto di tension cu no ta relata directamente na sucesonan den bida personal.
Un cantidad importante di ciudadano, tabata experencia un falta di trankilidad aunke den nan circulo directo mes no tabata tin factornan cu normalmente ta origen di e tipo di emocion.
Na entrada di fin di siman, dos informacion alentador a alcansa DIARIO.
Na prome luga por tuma nota, cu un constelacion nobo di Gobierno ta parce di ta na punto di wordo alcansa. Na segun lugar, pero no menos importante, por a tuma nota cu Polis ta prepara pa un presencia publico mas grandi den e fin di siman aki.
E dos factornan aki lo contribui na mas sentido di trankilidad na e ciudadano segun informantenan experto, cu kende DIARIO a resumi e realidad actual di e ambiente den comunidad cu ta afecta directamente e sentido di bienestar di un ciudadano.
Dos desaroyo sigur tabata tin impacto riba ciudadanonan durante e ultimo simannan.
Na prome luga e expertonan a mustra riba e regreso na bida normal despues cu Aruba tabata pa hopi tempo den e situacion excepcional di toque de queda y otro medidanan cu tabata influencia e actividadnan diario di ciudadanonan.
E medidanan cu a wordo tuma contra Covid-19 tabata mishi directamente cu e comunicacion directo entre hende y hende.
Durante toque de queda, e ciudadano no por a subi caya manera e tabata kier. E tabata obliga na keda cas of na pasa anochi na un lugar cu e no por a bandona prome cu e horario di toque de queda a pasa.
Na mes momento, luganan di encuentro tabata cera y autoridad sigur tabata tin mas bista di loke ta pasa riba caya y na otro luganan publico.
E medidanan aki, cu tabata directamente na interes di e ciudadano den cuadro di combatimento di Covid-19, a afecta actividadnan scondi y mundo criminal sigur.
Ta hustamente den ora di anochi, negoshinan scondi tabata tuma luga y centronan cu ta duna ocasion na actividadnan prohibi.
Na momento cu bida a bolbe na normal, e posibilidad pa actonan contra ley y tur nan resultado, tambe a bolbe na normal y hasta riba normal den un situacion social cu a wordo ocasiona dor di e forma cu e pandemia a mishi cu e condicionnan di bida di hopi hende.
E recuperacion cu a tuma luga te awor, a evita un mayor explosion di actonan criminal segun informantenan, cu a mustra con na hopi pais, e cantidad di hende y famia cu no tin entrada ta hopi mas halto cu na Aruba, loke ta afecta e grado di criminalidad tambe.
E situacion social ya tin impacto directo riba hende cu no ta parti di ningun circulo criminal pero ta biba cu e tension di debe cu mester paga cu no ta logra paga por ehempel.
Importante den esaki tabata, e falta di claridad y hasta incertidumbre cu e temporada di eleccion a ocasiona.
Den e temporada di eleccion por a nota un grado halto di agresion politico cu a haci e tension cu tabata biba den comunidad aumenta.
E impacto di politica na 2021, cu a wordo hiba na un forma cu directamente tabata causa tension, a causa tambe pregunta con den futuro gobernacion lo ta.
E hecho cu awor a wordo anuncia cu tin un formacion di gobierno, a baha e incertidumbre pa futuro cu a reina durante ultimo simannan.
Segun expertonan e fin di siman aki e hecho cu Polis a anuncia cu e lo ta mas visibel riba caya, ta crea mas trankilidad den e poblacion cu tambe ta tuma nota cu stabilidad gubernamental ta na caminda pa asina yuda garantisa un regreso na e sentido di paz, relacion normal entre hende y un normalisacion despues di Covid-19.
