ORANJESTAD (AAN): Den fin di siman, Partido MEP a tuma nota di expresionnan di Parlamentario Aquanette Gunn di partido MAS contra Gobierno di Aruba, en especial e Crisis Team.
Den su expresionnan via Social Media, Gunn a lansa un cantidad di pregunta na Crisis Team cuestionando e experticio di henter Crisis Team. Algo similar Parlamentario Mervin Wyatt-Ras di AVP tambe a haci.
Mas y mas tur hende por mira con bon alinea MAS y AVP ta. For di cas di partido di AVP, e Eman nan ta dirigi AVP y MAS pareu. Eman ta duna un ordo y Ras y Gunn ta bula mesora.
Ambos ta profesional y pesey ta asina mahos pa mira con nan ta cuestiona otro profesionalnan. Profesionalnan di Crisis Team a maneha e crisis di Covid-19 pa 22 luna caba na forma hopi exitoso. Aruba ta un ehempel den mundo pa con a maneha e crisis.
Pesey ora dos parlamentario di oposicion riba ordo di Eman ta rebaha nan mes di e forma aki, y ta ataca profesionalnan den cuido y den siguridad di nos pais, e ta hopi lamentable.
Un conseho na señora Aquanette Gunn: ora bo tin duda of pregunta, haci uzo di bo derecho constitucional di yama e profesionalnan of e ministernan den Parlamento, of manda preguntanan por escrito pa nan segun procedura di nos Constitucion. Pa asina nan duna cuenta. Subi Facebook cuestiona no ta solamente infantil, pero no ta efectivo si realmente un Parlamentario kier haya informacion.
Lo miho cu señora Aquanette Gunn por haci ta stop di bula cada biaha cu AVP bise bula. Uza bo propio huicio, uza bo propio sentimento. Lo bo ta mustra hopi mas genuino asina
