Filosofo di Harvard y autor di buki renombra Michael Sandel a yega Aruba pa conferencia di Bon Comun

ORANJESTAD (AAN): Diamars merdia, Prome Minister mr. Mike Eman, a ricibi Profesor di Filosofia Gubernamental y Politico y autor mundialmente reconoci, Michael Sandel,

cu a yega hunto cu su esposa, pa forma parti di oradornan invita  pa e conferencia di e Bon Comun cu ta tumando luga diabierna awo den Renaissance Wind Creek Convention Center.

Michael Sandel ta un profesor di filosofia politico na Harvard University y uno di e filosofonan publico mas influyente di mundo. Su trabounan ta concentra riba husticia, etica, democracia y e limite moral di mercado, y a wordo traduci na mas di 30 idioma. Su curso Justice a bira e prome curso di Harvard disponibel gratis online y riba television, cu a yega miyones di hende rond mundo.

Sandel ta autor di hopi buki di gran impacto, manera The Tyranny of Merit, What Money Can't Buy, Justice y Liberalism and the Limits of Justice, cu ta conecta filosofia politico clasico cu asuntonan moral y civico mas compleho di nos tempo. El a duna conferencia na diferente pais y na institucionnan di prestigio manera Oxford, Sorbonne y e Library of Congress di Estados Unidos, y tambe a duna e BBC Reith Lectures.

Cu e compromiso claro pa hiba e filosofia mas leu cu academia, Sandel a lidera discusionnan publico global pa medio di television, radio y plataforma online, incluyendo debatenan transmiti na Brasil, Japon, China, India y Reino Unido. Su trabou recien ta inclui e curso online Tech Ethics, cu ta trata e dilemanan etico relaciona cu AI y tecnologia digital.