‘Federatie Dutch Caribbean Mental Health’ ta promove calidad di cuido di salud mental riba tur e islanan den Reino

ORANJESTAD (AAN): Riba 17 di april ultimo, durante un conferencia cu a tuma lugar na Corsou,

diferente partner di salud mental (GGZ) den e Caribe Hulandes a logra adelanto den nan esfuerso pa intensifica e acuerdo di colaboracion titula ‘Dutch Caribbean Mental Health’ y a expresa nan deseo di formalisa esaki den un entidad huridico. Meta di ‘Federatie Dutch Caribbean Mental Health’ ta pa promove calidad di cuido di salud mental riba tur e islanan den Reino. E federacion lo facilita intercambionan di experticio di contenido y e parti organisatorio. Principalmente riba e tereno di calidad, desaroyo continuo, ley y regulacion y educacion.

E organisacionnan cu ta parti di e entidad aki ta: FSMA Respaldo (Aruba), GGZ Curaçao (Capriles), Verslavingskliniek Brasami (Corsou), PSI Skuchami (Corsou), Mental Health Foundation Sint Maarten y Mental Health Caribbean (Boneiro, Sint Eustatius y Saba).

E directornan y directiva di e organisacionnan a bini hunto pa participa na e conferencia cu a tuma lugar na Corsou y ademas pa delibera riba e condicionnan pa institui un federacion. 

Conferencia na Corsou

Tema di e conferencia tabata ‘Cuido di Salud Mental (GGZ) y cuido forense (FZ). Durante e conferencia oradornan di tur parti di Reino a comparti nan experticio y experiencia tocante GGZ y FZ. Topiconan cu a bini dilanti ta entre otro desaroyonan di ley, GGZ obligatorio, tratamento forense durante detencion, cuido forense ambulatorio, cuido di adiccion y cuido despues di tratamento. Meta di e conferencia tabata pa bini cu proposicionnan pa mehora e colaboracion entre  instancianan di GGZ y FZ den e parti Caribense di Reino. Conhuntamente a presenta e recomendacionnan na ministernan di e paisnan den Reino presente cu e intencion pa mehora diferente formanan di cuido obligatorio y forense. 

For di Respaldo tabata presente señora Caroline Hart, directora di FSMA Respaldo y dokter   Nathalie Kingsale (psikiatra), kende tambe tabata un di e oradornan. Durante su presentacion dr. Kingsale a splica tocante ‘Tratamento forense ambulatorio den FACT’, y despues ela forma parti di e panel di discusion.

Riba potret por aprecia di robes pa drechi: Angelica Dijk (PSI Skuchami), Amy van der Linden (Mental Health Caribbean), Erik Jansen (Mental Health Caribbean), Tineke Alberts (GGZ Curaçao), Nathalie Kingsale (FSMA Respaldo), Henk Kamsteeg (GGZ Curaçao), Suliviën Lopez (Brasami), Hendrikus van Gaalen (Mental Health Foundation), Caroline Hart (FSMA Respaldo), Ijolene Klaber (Brasami).

Rumbo pa un organisacion di salud mental specialisa profesional y sostenible pa un Aruba mentalmente sano.