Baden Powell tabata tin un motibo legitimo pa dicidi pa Sint Joris
ORANJESTAD(AAN)—Uno di e preocupacionnan serio den e mundo moderno, ta e forma con e base pa conducta di hobennan ta wordo afecta pa un cantidad di problema, cu DIARIO continuamente tambe ta trece dilanti.
Mundo ta den un ambiente di guera mientras cu riba tereno cientifico diariamente ta wordo papia di peligronan cu cual hende lo wordo afecta na planeta tera.
Situacionnan cu no ta nada positivo pa hobennan, ta keda presenta na un mundo cu ta wordo guia pa produccionnan demasiado bez sumamente negativo cu inventonan moderno di comunicacion ta entrega na muchanan.
Na mes momento e basenan di educacion di un mucha ta topa cu peliger cu formulanan familiar nobo mientras tambe educacion riba un plataforma general, ta motibo di preocupacion.
Esaki ta haci cu hobennan ta den necesidad di tur loke por duna nan sosten den e mundo cu como hoben nan mester enfrenta y cu ta contene cantidad di atraccion peligroso riba tur tereno.
E balornan cu cual e hoben ta wordo alimenta riba tereno cu no ta material, sigur ta bira tur dia mas importante.
Ora papia di Dia di Sint Joris, ta papia sigur di e base di loke Scouting kier alcansa.
Tabata Baden Powell mes cu a dicidi cu Sint Joris, San Jorge, Saint George, lo a bira patrono di e movementonan di scouting.
Na su parecer, e santo ta representa tur loke mester busca cerca un hoben cu kier resalta riba e tereno di scouting, cu ta sostene balornan sumamente importante cu e hoben mester sigur den e mundo moderno, cu ta deshaci di norma y balor.
Miembronan di scoutint a wordo introduci na e necesidad pa nan enfrenta problemanan sin miedo y no hala atras pa nan balornan y normanan na e momentonan mas dificil.
Normanan cu a bay perdi cerca demasiado hoben, ta bini dilanti den scouting, cu sigur merece sosten di un comunidad, cu tanto hoben en busca di balornan cu a bay perdi.
Scouting ta representa un sosten pa hobennan den nos temponan moderno, cu ta causa confusion y perdida di balor na demasiado hoben.
