Expertonan di Hulanda a bin siña alumnonan di Pius X School con pa programa y traha cu robot

ORANJESTAD (AAN): E siman aki, e Proyecto di Robot na Pius X School na Dakota a hala hopi atencion mes.

   Docente Raina Kock a splica cu nan a ricibi bishita di un grupo di persona cu a bin di Hulanda cu a bin duna demostracion na Alumnonan, pa nan mira di con e tecnologia den enseñanza ta cambiando, y ta mustrando e muchanan encuanto Robot.

   E ta un grupo di docente cu a sigui un workshop di nan, y a bin demostra diferente aspecto cu por wordo usa den educacion awendia, incluyendo robots, y tur cos inovativo cu por wordo agrega pa asina haci e lesnan mas atractivo y asina yega “mas rapido” na e muchanan.

   Nan a reuni den Gymzaal unda e muchanan a sinta y scucha e docentenan aki di Hulanda splica con e sistema di educacion aki ta funciona, unda e muchanan ta ‘programa’ e robot a base di tarea cu e docente ta duna den klas.

   Cada uno tin su forma diferente di programa, e.o. e ‘Beat-Bot’ tin di wordo programa con e tin di tuma un rumbo di sea man robez, man drechi, dilanti, patras, etc.  Haciendo un tarea, ta haci esaki mas atractivo pa mucha.

   E docentenan a traha un mapa di Aruba tambe cu ta forma parti di e tarea pa haci e trabao mas ‘local’ cu e muchanan por compronde.  Y e alumno ta siña cu via e programa, e ta educa e ‘Beat-Bot” con e por usa un ruta pa yega na su destino.

   E ta pone e mucha pensa con e por usa un caminda mas largo, of caminda mas cortico.  Tur esey e ta hinca den su cabez den su trabao pa programa e robot.

   Muchanan di Klas 1 y Klas 2 a haye prome, y e muchanan a keda excita pa e sistema di robot aki.  Cu practica ya caba nan a captura rapidamente con ta bay programa e Beat-Bot aki.

   Docentenan ta haya cu esaki ta algo bon, hopi positivo pa muchanan y nan ta bira mas pendiente di nan les, traha mas na nan nivel y compronde e tarea mas.  E ta demostra cu inovacion den enseñanza ta hopi importante, como cu e ta uno cu ta sigui progresa y docentenan tin di percura pa sigui su tras pasobra e ta na bienestar di e muchanan.