Director di DPS, Ivan Croes:
ORANJESTAD (AAN) — Director di DPS, señor Ivan Croes, den e conferencia di prensa yama pa SETAR NV, en conexion cu firmamento di un acuerdo entre e compania aki y DPS (Departamento di Scolnan Publico), a expresa cu DPS ta hopi contento cu e logro aki.
El a menciona cu e ultimo añanan aki scolnan publico a cuminza ekipa nan mes cu smart tv, tambe na duna les menos for di buki y mas digital, y ora di haci uso digital mester tin un sistema stabil di internet.
“Mi ta kere cu e convenio cu nos a firma awo, ta brinda nos e posibilidad di tin un internet stabil na scol pa asina nos por sigui explora riba e diferente terenonan, con nos ta yuda nos muchanan den klas. Nos muchanan ta pidi nos den e caso aki, un otro manera di haya les. Mi ta kere cu nos mester scucha nan, maestronan y cabezantenan di scol tambe.
Mi ta kere cu e agreement di awetardi ta un stap grandi pa nos, anto pa nos sigui traha riba e parti digital di nos scolnan”, Ivan Croes, director di DPS, a señala. El a subraya cu tin algun klas cu ta full digital, pero no tur. DPS mester sigui traha pa cera esaki pa otro klasnan pa bay completamente digital. Tin scol cu den e parti di matematica y idioma Hulandes ta bezig caba cu e parti di lesnan, y e ta algo cu ta atrae e alumnonan. Por ehemplo den e vak di Aardrijkskunde si ta papia di volcano e alumnonan kier wak esaki tambe, y pa haci esey mester tin e parti digital in place pa haci e lesnan atractivo, cual ta e idea pa haya atencion di e muchanan den les”, Ivan Croes a comenta.
Tin scolnan cu a cuminza cu e parti di IPET tambe, pa e muchanan den klas. Esaki ta algo cu scol no tabata prepara pe durante e pandemia.
“Enberdad bo a habri scolnan pa e muchanan bin, nan a haya les den grupo, pero ora yega cas e parti ey no a sigui. Mi ta kere cu mirando e sistema cu nos tin, si algo asina mester sosode bek, mi ta kere cu nos scolnan lo bira un lugar sigur, unda nos muchanan lo por bin y haci nan lesnan pero si nan ta conecta tambe”, Ivan Croes a señala.
