Reunion di Parlamento ayeramerdia a haya buelta inespera -- Laptop, iPhone y Macbook a resona ayera den sala di Parlamento -- Ekipo di Gobierno ricibi como Ministro ainda den posesion di Marisol
ORANJESTAD(AAN)- Diahuebs Parlamento di Aruba a reuni pa atende e concepto pa un “Reglamento di Orden” nobo pa Conseho di Ministro.
Un Reglamento di Orden di Parlamento of di Gobierno ta contene e reglanan basico pa funcionamento manera entre reunionnan di e organonan ehecutivo y legislativo.
E reunion di ayera a haya un contenido inespera. Sin duda e lo no keda recorda dor di publico pa e Reglamento di Orden, pero mas bien pa loke por considera e desenlace di salida di Marisol Lopez-Tromp for di Conseho di Ministro na 2021 ora su propio partido (POR) a bisa cu e no tin confiansa mas den Marisol Lopez-Tromp.
For di e momento DIARIO a splica Aruba cu segun leynan cu ta regla e forma indirecto cu Pueblo ta scoge su gobernantenan, un Ministro cu no tin confiansa di su partido mas, mester bay cas.
Na cierto momento pues, e salida di Marisol di Gabinete Wever-Croes na 2020 cu a a bira un scandal politico, a bira topico di e reunion di Parlamento ayera ora Marisol Lopez-Tromp a trece su retiro dilanti.
Prome Ministro Evelyn-Wever-Croes a duna un splicacion breve di loke a tuma lugar rond di e retiro di Marisol Lopez-Tromp como Ministro.
Segun Marisol Lopez-Tromp a trece dilanti, Prome Ministro Wever-Croes a tarda pa yama su persona pa atende e situacion.
Marisol Lopez-Tromp mes a a admiti cu el a ricibi tres dia largo yamada di Prome Ministro Wever-Croes.
Pero Marisol Lopez-Tromp kier a wordo yama den e fin di siman despues di e reunion di Parlamento en cuestion, cu DIARIO mester bisa lo ta dificil pa Aruba lubida ya cu e salida di Marisol Lopez-Tromp ora su partido a bisa cu e mester baha como Ministro, no a bay sin protesta di Marisol Lopez-Tromp cu kier a keda Ministro sin sosten di su partido.
En todo caso, ayera e salida di Marisol Lopez-Tromp pues a haya un rabo ora el a bisa cu Prome Ministro no a yama pa reuni cu su persona, pero despues a bini dilanti cu Prome Ministro Wever-Croes despues di fin di siman kier a reuni y a yama Marisol, cu aparentemente a lubida algo importante.
Realmente si Marisol Lopez-Tromp a papia of no papia cu Prome Ministro Wever-Croes lo no a cambia nada den e hecho cu e mester a bay cas despues cu su propio partido a manda su persona cas.
Manera a bini dilanti ayera den e reunion, ora Marisol Lopez-Tromp a bay cas, el a bay cu laptop, cu iPhone y cu Apple Macbook cu el a lubida aparentemente di debolbe na Gobierno y awe ta den su posesion.
Pa Prome Ministro Wever-Croes ora e no a haya reaccion di Marisol Lopez-Tromp durante tres dia cu el a trata di establece contacto, e mester a conclui cu Lopez-Tromp no tabata interesa pa papia cu su persona.
Ademas Prome Ministro Wever-Croes a splica cu tur hende cu “poco fatsoen” ta tene honor na su mes, si su partido no ta sostene mas.
E desaroyo rond di Lopez-Tromp a tranca Gobierno y mester a informa Parlamento cu e no ta Miembro di Gobierno mas.
Cu Marisol Lopez-Tromp a bay cas na 2020, ta conoci pa Aruba cu, sinembargo no tabata na haltura cu Lopez-Tromp a lubida cu e mester a entrega ekipo di Gobierno cu e tabata tin den su poder.
Secretaria di Conseho di Ministro a manda Lopez-Tromp diferente carta cu e no a contesta.
Ta trata aki di computer laptop y iPhone cu te awe ta den poder di Marisol Lopez-Tromp cu a admiti durante e reunion cu esaki ta e caso.
Lopez-Tromp a presenta e hecho cu e ex Ministro Otmar Oduber, cu Marisol a reemplasa pa POR, tabata drenta y sali oficinanan di Gobierno.
Prome Minister a splica cu esey tabata pasobra Minister Bikker e tempo ey a pone e ex Minister na cabes di un comision. El a wordo remove di e puesto ey unabes cu ela bira sospechoso.
Prome Ministro Wever-Croes a urgi Marisol Lopez-Tromp pa debolbe e ekiponan di Gobierno cu e tin awe ainda den su posesion y cu ta ekipo cu ta pertenece na Pais Aruba y cu Marisol Lopez-Tromp lo a lubida pa debolbe.
