Lenny Geervliet Coordinador Proyecto 125:
ORANJESTAD (AAN) – Den entrevista cu señora Lenny Geervliet, Coordinador di Proyecto 125, el a menciona cu en principio e iniciativa aki a nace pa combati soledad y aislamento cerca adulto mayor.
Geervliet a duna di conoce cu nan tin un siman cu e liña di telefon 125 ta draai y e adultonan mayor cu yama ta trece un variedad di tema “cu bo no por kere”.
E temanan ta bay di cu e tin cu muda pa otro cas, te cu remedinan cu ta caro. “A lo largo, si bo ta registra e yamadanan aki bon, cualnan ta anonimo, bo por haya un bon bista di e problemanan cu adulto mayor aki na Aruba, ta topa. Asina por drecha nan situacion y purba bin cu mas proyecto cu ta yuda nan. Pues, esey tambe ta un funcion di e linea di telefon”, Lenny Geervliet a señala.
E dama a agrega cu nan ta bay acerca diferente instancia pa wak con por realiza un cooperacion mas lihe en caso cu e grandi ta hayando su mes den un situacion di crisis.
Pero na prome instancia 125 tey pa scucha y duna conseho kico e adulto mayor mes por haci. Si e ta den un situacion di crisis nan ta combersa cune, wak kico e mes por haci.
E aspecto mas preocupante ta cu ora un hende ta bira adulto mayor e ta entrega. “E ta keda entrega un parti di su salud, apart cu tin biaha bo tin cu deal cu perdida. Sea cu bo mascota a bay laga bo of famianan, y segun cu edad ta subi den bo red social tambe e hendenan nan edad ta subi, y ta haya mas y mas complicacion den nan bida.
Geervliet a bisa cu transport ta un di e complicacionnan aki. Esaki ta algo cu ta isola hende mas y mas, pa motibo cu si na cierto momento bo bista, of bo curpa, no ta duna mas pa bo core auto, na Aruba bo ta isola, hopi facil y mas lihe”, Lenny a señala.
