Jonathan Upegui, Hefe di “National Accounts” a relata:
ORANJESTAD (AAN) – Diabierna mainta CBS a convoca un rueda di prensa, den cual Jonathan Upegui, Hefe di Departamento di “National Accounts” na Oficina Central di Estadistica a hiba palabra.
Upegui a anuncia e comienzo di Censo Economico 2023, y desde e dia aki tin un total di 40 encuestador pasando na tur parti di Aruba, haciendo entrevistanan den tur e entidadnan cu tin na Aruba.
Esaki ta abarca tur negoshi y fundacionnan cu ta haci un actividad economico localmente. Nan a parti Aruba den 40 region y cada un encuestador, y cada un ta haya mas of menos entre 130 pa 140 negoshi cu nan tin cu bishita.
Upegui a indica cu tin negoshi cu ta Hof Kantor y tin cu ta filial. Tin negoshi cu ta sucursalnan cu ta sostene e oficina principal y nan tur mester wordo bishita pa e tellers. E encuesta ta bay tuma dos luna y mey, pues e ta termina dia 30 di Juni. CBS tin riba e lista cu nan a saca den nan “fieldwork” entre October y November, cu nan a recore henter Aruba pa wak cuanto negoshi tin, y en total nan a conta un tiki menos cu seis mil negoshi cu tur encuestador ta bay bishita.
“Pero desde Octuber-November pa awo, tin posibilidad cu negoshinan nobo a habri, of a cera, of a muda, y pesey nos ta spera cu e lista lo bay ta un tiki mas di seis mil”, Jonathan Upegui a señala.
E meta principal di e Censo Economico 2023 ta pa CBS update su data base di negoshi, y asina tambe haya e structura economico di Aruba, cuanto negoshi ta, den cuanto actividad economico.
“Nos departamento National Accounts, nos tarea principal ta calcula e DGP di Aruba. E DGP di Aruba hopi hende ta wak’e como djis un cifra. Pero nos ta wak kico ta tur e productonan cu e negoshinan ta ofrece, pero tambe kico ta e productonan cu ta uza den cas, pa haci nan negoshi. Por ehemplo un supermercado ta ofrece producto di cuminda, productonan di haci limpi, nan ta uza awa cu coriente pero tambe si tin un compania cu ta haci limpi, pues nan ta uza tambe e servicionan pa haci limpieza, pues asina nos tin cu wak’e, cada compania individual”, Upegui a splica.
Upegui a agrega cu kier wak’e na un manera hopi micro, e encuesta aki por yuda CBS duna e DGP, of e contribucion individual di cada negoshi na Aruba. Esey ta e meta principal di e encuesta, pero tambe update tur nan listanan y e ora ey ta na un nivel mas adecua pa publica CBS su estadisticanan na instancianan internacional manera Banco Mundial, IMF, UNSD, cu semper ta puntra pa CBS aplica manualnan mas up to date.
