Empleadonan di Aruba Beach Club cu dos ora di accion di protesta Diabierna mainta

Hose Figaroa a splica cu Gerencia no kier negocia CAO nobo:

ORANJESTAD (AAN) – Empleadonan di Aruba Beach Club a tene un walkout durante dos ora, Diabierna mainta, cu presencia di Tyron Bremo y Hose Figaroa, Presidente di e Federacion di Trahadornan di Aruba (FTA), cu ta representa e empleadonan aki.

Hose Figaroa menciona cu: “E motibo di esaki ta cu pa basta tempo nos ta negociando cu e gerencia di e hotel aki, pa yega na un contrato colectivo nobo y e negociacionnan a pega. Gerencia a duna di conoce cu nan no ta dispuesto pa duna nada na e trahadornan, y esey ta nifica cu no tin sentido mas pa negocia, y a cuminza awe cu un accion di protesta contra e posicion cu gerencia a tuma”.

E presidente di FTA a declara cu e trahadornan cu ta traha eynan tur dia y nan ta wak cu tin espacio pa mehora nan condicionnan di trabao, y e postura cu e gerencia a tuma, ta totalmente inaceptable pa nan.

Segun gerencia, nan no por mehora e condicionnan di trabao pasobra e cifranan no ta suficientemente positivo pa haci esey, y di otro banda tur indicacion di e trahadornan cu esey no ta e caso, y cu e hotel no ta draai malo.

Figaroa a agrega cu esaki ta un di e propiedadnan timeshare, y esakinan practicamente no a sufri durante e periodo di pandemia, y esaki ta basa riba e hecho cu e membresia ta wordo paga anualmente. Esey kiermen, cu e guest bin of no e membership mester wordo paga.

Pues, financieramente e efecto pa e sector timesharing tabata minimal cu e pandemia.

“Mi tin cu bisa si, cu gerencia a tuma un postura cu di parti di e sindicato nos ta condena totalmente, y awe mainta a manda indica cu lo actua contra esnan cu a bin para pafo, y nos como sindicato lo no acepta esey nunca. Esaki ta un derecho di e trahador cu na momento cu tin malcontento manifesta esaki den un protesta y ta totalmente iresponsable di e management, pa amenaza asina esnan cu lo vocifera nan malcontento, cu nan trabao ta na peligro. Nos lo percura pa esaki no sosode, nos lo defende e trahadornan aki den caso cu management hinca den su cabes haci algo contra e trahadornan aki”, Hose Figaroa, Presidente di FTA a señala.