SANTO DOMINGO: Departamento di Casino y Gambling na Republica Dominicana, a destrui e siman aki un total di 4.462 machine di wega di bet,
cu ta producto di loke a wordo confisca entre November 2020 y November 2021 den diferente establecimento comercial, y tambe negoshinan di gambling.
Tambe a destrui varios Jackpot machine cu a wordo entrega door di Casinonan mes pa wordo destrui como cu nan a bira bieu, y tambe a destrui esnan cu tabata wordo usa na algun sala di wega cu tabata opera sin permiso debidamente autoriza.
Den tur e accionnan contra machine ilegal, nan a confisca un suma di como 7 miyon Pesos Dominicano (como 222 mil Florin Arubano) cu a ser haya na e lugarnan sin permiso.
Entre e equiponan tabatin 1.254 Jackpot machine, di cual 910 a wordo confisca den varios supermarket y restaurant cu a wordo instala sin cu tin e permiso necesario.
Esaki a inclui 1.534 printer, 392 aparato/POS di Verifone, 215 smartphone, y 1.031 router. Mey-mey di e equiponan confisca, tabatin algun cu por a wordo usa pa Institucionnan Social, y eseynan a wordo entrega como donacion.
