Sean Lalani: --- ORANJESTAD (AAN): Diahuebs na Nicolas Store a tuma lugar firmamento di un acuerdo entre Gobierno di Aruba, WEB Aruba N.V y Eagle LNG.
Despues cu Minister di Energia Glenbert Croes a hiba palabra, a toca turno na director di WEB Lati Wever.
El a trece dilanti cu tabata un negociacion pisa, pero cu hopi comprension, ayudo y esfuerzo a logra un acuerdo cu ta na e mihor interes pa Aruba.
“Mi ta hopi orguyoso di e logro aki pa WEB y pa Aruba”, segun e director.
Presidente di Eagle LNG Sean Lalani tambe a hiba palabra.
“Awe ta un logro hopi importante despues di un trayecto di un decada largo pa haci un esfuerzo pa trece gas natural pa Aruba”.
Esaki a cuminza 10 aña pasa, pero 13 luna pasa un paso importante a wordo tuma ora cu Eagle LNG a wordo selecta pa traha cu RdA, segun Lalani.
El a sigui bisa cu despues di esey a tuma lugar 8 luna largo di negociacion hopi fuerte y intenso cu WEB Aruba N.V.
Segun Lalani, Eagle LNG ta increiblemente honra pa bin Aruba y increiblemente honra pa drenta den e acuerdo pa yuda WEB y Aruba haci e transicion di fuel oil caro, sushi y volatil, pa gas natural cu ta mas economico y limpi.
Esaki den e proceso di bay den direccion di un futuro cu zero carbon.
“Gas natural ta un pieza esencial den e intento di logra un sociedad cu ta bay emiti 0 carbon no solamente na Aruba, sino full rond mundo”.
Pa un isla manera Aruba, ta importante pa por haci uso di electricidad pa reemplaza fuel, incluyendo na cas y den auto.
Pa haci esaki ta crucial pa provee coriente pagable, stabil y confiable, pa cual Eagle LNG ta esencial pa logra esaki, segun Lalani.
