A traves di firmamento di e acuerdo di LNG pronto Aruba lo ta ‘back on track’

Minister Glenbert Croes:  ---  ORANJESTAD (AAN)- Diahuebs a tuma luga un momento historico pa Aruba, Mandatarionan di Gobierno di Aruba tabata presente pa e ceremonia di firmamento di acuerdo di LNG entre WEB Aruba NV y Eagle LNG.

             Minister di Labor, Energia y Integracion Glenbert Croes a anuncia cu siguientemente lo inicia negociacion cu Refineria di Aruba (RdA) pa e luga designa pa realisa e infrastructura di e facilidad pa ricibi LNG y tambe pa distribui esaki entre otro pa WEB.

            ‘Despues di mira e caminda largo cu a cana y esfuerso di diferente Gobierno pa introduci energia mas limpi pa Aruba, finalmente e dia a yega unda cu e firmamento di acuerdo di “Gas supply” entre Eagle LNG y WEB Aruba NV ta tuma luga.’ Como Minister di Energia sr. Croes a expresa di ta apoya e proyecto aki totalmente.

            Mirando e historia di diferente esfuerso cu a wordo haci den pasado por mira bek na e proceso di ROI pa industria alternativa a cuminsa na 2019. Na e momento ey Minster President Evelyn Wever - Croes tabata Minister di energia pa cual a traves di e proceso encamina, Eagle LNG a sali e compania escogi. Cual a conduci na e momento historico cu a tuma luga.

            E mandatario ta felicita Eagle LNG pa nan determinacion pa hunto yega na un acuerdo cu ta un win-win pa ambos partido.

            Pa conclui, Minister Croes a gradici presencia di coleganan Minister manera Minister di Husticia Rocco Tjon, Minister di Finanzas Xiomara Maduro, Minister di Enseñansa Endy Croes y tambe tur miembro di Parlamento y esnan di San Nicolas Business Association (SNBA).