ORANJESTAD (AAN): Recientemente ora a anuncia cu FASE a yega su final, Minister Glenbert Croes durante un rueda di prensa a elabora extensamente riba e programa “Aruba Kier Traha”.
Esaki ta e programa institui pa e mandatario cu mester percura pa e transicion di tur hende cu tabata riba FASE, por drenta bek nos mercado laboral. Aruba Kier Traha ta percura encamina e proceso di reintegracion via Departamento di Progreso Laboral den comunicacion estrecho y continuo cu Comercio pa por logra exitosamente yuda nos hendenan cu tabata riba FASE, bek na trabou.
Den cuadro di esaki, Aruba Kier Traha conhuntamente cu Enseñansa pa Empleo tin como meta ofrece cursonan di recapacitacion na tur esunnan cu tabata ricibi FASE cu e meta di yudanan cu nan re-integracion den mercado laboral.
Recientemente e prome 2 grupo a haya e curso di “Mindset Reset” ofreci pa e profesional Jennifer van der Biezen. Un total di 28 cursista a logra finalisa esaki cu exito. Y mientras tanto ya tin algun di e cursistanan cu a logra haya trabou.
Un testimonio: “Si no tabata pa e curso aki mi ta sigur mi no a haya e trabou cu mi a haya.” Otro testimonio: “Mi a pasa masha hopi contratiempo e dia di mi entrevista. Si no tabata pa e curso di “Mindset Reset” lo mi no a sigui pusha pa toch presenta pa e entrevista.” Y awe orguyosamente nos por bisa cu e persona aki a haya e trabou tambe.
Durante un encuentro ameno na Enseñansa pa Empleo, Minister a entrega e certificado na e cursistanan felicitando tur pa nan empeño y dedicacion.
