*Intencion ta pa pasaheronan no bay aeropuerto demasiado trempan
ORANJESTAD (AAN): Recientemente DIARIO a entrevista Chief Operating Officer (C.O.O) di aeropuerto Jurgen Benschop tocante e proyecto di ‘Passenger Flow Control’.
El a splica cu entrante Diaranzon 1 di December ta bay introduci un asina yama 'passenger flow control'.
“Esaki tin di haber cu e hecho cu nos ta wak un crecemento di e volumen di pasahero den e periodo di winter, cu ta core di December te cu Maart”.
Tambe nos tin construccion andando den e parti Mericano di check-in, segun Benschop.
El a splica tambe cu algun siman pasa e tabata cu un delegacion na Washington, pa comienzo di negociacion cu autoridadnan Mericano riba e tratado di ‘preclearance’ pa Aruba.
“Eynan nan a pidi nos cooperacion pa nos controla e fluho y e volumen di pasahero cu ta drenta den terminal, pa garantiza cu bo no ta haya bo cu un cantidad halto di pasahero trempan den e proceso”.
Locual nos a ripara ultimo tempo ta cu tin hopi rij, door cu tin hopi pasahero ta warda na aeropuerto door cu nan ta bin aeropuerto hopi trempan.
Nan ta checkout for di hotel y ta wordo transporta mesora pa aeropuerto, siendo cu nan vuelo hopi biaha ta mas laat, segun e C.O.O.
El a splica cu e pasaheronan aki cu tin vuelo laat pero ta trempan na aeropuerto, ta pone hopi presion riba e facilidadnan cu no ta diseña pa handle e volumen halto di pasahero.
Benschop a splica cu entrante 1 di December ta bay cuminza pone asina yama ‘ambassadors’ cu ta bay controla na e portanan, unda cu tur pasahero ta haya un code di color, cu tin di haber cu e orario di salida di nan vuelo.
Tal momento, tal color di grupo ta wordo permiti pa drenta aeropuerto pa cuminza check-in.
Benschop a splica cu normal ta pidi e pasaheronan pa ta na aeropuerto 3 ora adelanta y esey ta bay sigui asina.
Locual tin mester di dje ta cooperacion den tur cu ta envolvi, incluyendo hotel, tour operators etc.
“Si tur hende coopera pa no trece e pasaheronan mucho trempan pa aeropuerto sino na nan ora corecto, e ora ey nos tin menos pasahero den rijnan para y automaticamente e fluho ta bay mas mihor”, segun e C.O.O.
