ORANJESTAD(AAN)—DIARIO a mira y studia e portretnan. DIARIO a papia cu cantidad di Arubiano, cu ta puntra nan mes con por ta posibel cu Gilbert Webb ta busca un asiento den Parlamento,
cu realmente mester a investiga e practicanan di Gilbert Webb cu segun Huez a bisa den un caso den Corte, tabata tin e base necesario pa wordo investiga dor di instancianan oficial cu ta proteha mucha na Aruba.
Awe DIARIO ta habri su informacionnan riba e asina yama “Bootcamp” di Aruba, cu segun informantenan nunca mester a existi na un estado di derecho manera Aruba cu a bay di acuerdo cu e Derechonan di Mucha di Nacionnan Uni.
DIARIO a bay na e base di loke ta permiti na un Estado di Derecho pa coregi mucha y a wordo mustra dor di expertonan cu na tur pais tin mucha cu hasta pa motibo di nan mayornan mes, ta mucha probablematico.
Mas y mas comunidad ta atento pa e problemanan serio cu por surgi di tur banda ora cierto sectanan peligroso cu ta haci uzo di supuesto religiosidad, haya forsa riba muchanan. Tambe mas y mas rond mundo ta tuma nota di personanan abusado cu ta uza problemanan di famia pa haya poder riba muchanan cu nan por uza den nan sed di poder.
Tur comunidad na mundo ta sumamente alerta cu e gruponan aki na un mundo cu ta deshaci di tur forma cu mucha y hobennan por bira victima di gruponan y hasta organisacionnan oficial cu no ta respeta derecho di mucha y hoben.
Un prueba ta e hecho cu na Universidadnan caminda antes tabata conoce Ontgroening, cu tabata un periodo pa miembronan nobo wordo prepara pa drenta club hubenil, wordo cambia y deshaci di tur training y custumber peligroso.
Informantenan ta puntra nan mes con por ta posibel cu Huez den un veredicto a bisa cu instancianan manera Voogdijraad a haci bon di actua contra Bootcamp di Gilbert Webb cu a crea su propio version militar pa a base di su pensamentonan bay educa muchanan cu mayornan mes no kier atende cune.
Informantenan di DIARIO a tuma nota di portretnan caminda muchanan ta wordo castiga, manera Gillbert Webb mes a bisa cu ta haci cu nan si nan no ta di acuerdo cu loke grupo Webb bisa nan.
Gilbert Webb no tin ningun preparacion pa atende cu mucha oficialmente y si den informacionnan ta bisa di tin cantidad di hasta maestronan cu ta haci cu muchanan por bay school na Bootcamp mes.
Tin diferente sorto di Bootcamp awendia. Tin Bootcamp caminda practicantenan di un deporte ta uni pa algun dia pa practica hunto.
Bootcamp Aruba di Gilbert Webb, cu ta bisa abiertamente cu e ta traha awe pa un futuro diferente, segun reglanan cu e ta aplica ta basa riba militarismo cu ta wordo aplica na paisnan dictatorial, comunista, pero cu sigur ta topa na camponan di castigo na Rusia y tabata e caso na camponan di Adolf Hitler, cu a destrui Alemania y mundo cu e hobennan cu el a kita for di nan mayornan y hiba campamento.
DIARIO lo sigui informa Aruba cu un luho di detaye riba e asunto di Bootcamp, cu segun Arthur Dowers como Ministro di Husticia e tempo Gobierno mester a tolera aunke esaki ta haci cu Gobierno no ta proteha muchanan!
Aruba mester ta cauteloso cu HTC, Bootcamp y Gilbert Webb cu aparentemente ta bisti na comandante pa atende cu muchanan!
