E dolor di e grupo mas den necesidad ta wordo ignora y lubida --- Placa a bira menos pa tur cu tabata depende di fin di aña --- E circulacion tradicional di placa den dianan di fiesta a tranca
ORANJESTAD (AAN)- Ora DIARIO papia di egoismo, e ta papia di e dolor di tanto Arubiano cu durante e ultimo lunanan di 2021 lo no ricibi entradanan cu normalmente nan lo por a spera.
Cuanto Arubiano na 2021 atrobe lo no tin entrada na ayaca, ponche crema, pan de jamon, costura, trabou pa drecha cas pa topa cu temporada di Pasco?
Na hopi cas di Aruba ta reina mucho mas dolor cu e perdida di 12.6 porciento di salario.
Na hopi cas na Aruba, no por papia di entrada importante cu temporada di dianan di fiesta tabata trece y tabata yuda famia henter pa celebra aña nobo.
Di kico ta wordo papia ora bisa cu entrada di trahadornan di Gobierno mester baha cu 12.6 porciento?
Pa e grupo economicamente mas debil den comunidad pero tambe pa trahadornan cu den e temporada aki ta haya un placa extra, e falta di placa cu tin den circulacion ta un problema serio.
Na ningun pais na mundo, hende tin e sumanan cu e tabata tin pa dianan di fiesta.
Pa rico cu un persona ta, su entrada lo ta menos.
Pa e gruponan mas debil den comunidad, esaki ta nifica cu no por cubri gastonan cu tabata wordo paga cu tur e loke cushina, costura, trabou extra ta produci a base di tradicion.
Awe cu Aruba ta wordo menasa cu accion pasobra Aruba mester baha e salarionan di trahadornan di Gobierno, DIARIO mester tene su bista fiha riba loke oficialemente ta wordo considera e “economia di sombra”.
E entrada extra di hende cu ta haci cu nan por paga tanto gasto cu nan ta laga pa e lunanan aki.
Awe DIARIO ta solidario cu e grupo cu ta trata na tur forma di bende un pastechi mas. Un ayaca mas.
DIARIO ta solidario cu mamanan cu ta traha den oficina pero anochi ta cose pa asina mas placa drenta pa paga loke mester paga.
E dianan di fiesta ta motibo pa placa extra drenta pa paga gasto pa drecha auto cu mester keur. Pa cumpra articulonan cu mester den cas.
Tradicionnan di fin di aña ta encera cu placa extra ta drenta no solamente pa fiesta pero tambe pa haci gastonan pa por cubri pa loke por produci.
Aruba ta pasa den un situacion sumamente dificil manera henter mundo pero sigur como pais cu ta depende di turismo, cu a cera su portanan.
Hopi awe mester paga debe extra cu no por a paga pero tambe debenan cu bonus tabata cubri.
Awe ni e salario ta completo na un cantidad di fuente di trabou y no por papia di bonus.
E grupo di pobernan cu den e temporada aki por a bende nan bolo y paga drecha un dak no tin placa. Esaki ta haci cu e personanan cu den nan tempo liber tabata drecha dak pa por drecha nan dak, tambe no tin e entrada aki.
Comparti a e palabra di Pasco. Comparti alegria pero tambe dolor.
Na fin di 2021 cayanan di Aruba ta yena. No pa celebra hunto, pero pa accion di sindicatonan, cu tin miembro como nan fuente di entrada pero obviamente no ta comprende kico ta dolor di Pueblo.
Dolor di e personanan cu ayaca den nan freezer pero sin hende cu placa pa cumpra nan productonan, cu cual nan tabata paga nan gastonan!
