ORANJESTAD (AAN): Comunidad di Aruba a uni pa “McDonald’s Great Day”, un dia dedica na e donacion di tur benta di e famoso Big Mac na fundacion Centro Man na Obra.
Na final di e dia, a calcula cu un total di mas cu 1,109 Big Macs a wordo bendi pa yuda e organisacion ‘non-profit’ cu nan mision pa duna guia laboral na personanan cu limitacion intelectual na Aruba.
Tur 3 restaurant di McDonald’s na Aruba a participa riba e dia aki, unda cu clientenan a bin duna nan aporte na e campaña door di cumpra un Big Mac pa un bon causa.
E dia a cuminsa cu embahador Rocco Franken tumando pedido di Big Macs patras di e counter hunto cu tremendo entretenimento di Metropolis cu DJ Randy. Mas atardi, McDonald’s Seroe Blanco a ricibi bishita di Fun Miles, cu a bin rifa diferente premio, y tambe di Unique Celebration, cu a bin haci actividad cu e muchanan.
Pa finaliza e anochi, McDonald’s tabata tin Hits & Fun hunto cu nos amigonan di Buleria, Rocco Franken, Dwight Leoneta, y Josue Kelly. Nan a duna un great performance pa e muchanan y tambe e adultonan cu a bishita McDonald’s Seroe Blanco riba e anochi aki.
McDonald’s Aruba, Centro Man na Obra, y tambe Great Day su embahador, Rocco Franken, kier a gradici pueblo di Aruba cu a sostene e campaña di “Great Day” y haci’e un realidad. E team di McDonald’s Aruba ta orguyoso di por yuda e comunidad local pa medio di sostene iniciativanan cu ta crea miho oportunidadnan na nos ‘Rubianonan y nan futuro.
Esnan cu a aporta a haci nan contribucion directamente pa yuda nan prohimo, cu apesar di nan tin habilidadnan diferente toch por bira un adulto exitoso y independiente. Danki na esnan cu a yuda, Centro Man na Obra por continua cu su guia pa asina e personanan concerni por sigui adapta nan habilidadnan, sigui bira mas independiente, sinti nan mes mas util, y por hasta yega asina leu di haya un trabao den diferente industria.
Organizadornan ta gradici tur contribucion riba e dia special aki y lo conta un biaha mas cu apoyo di comunidad otro aña pa McDonald’s Great Day 2022.
{gallery}Un total di 1,109 Big Macs a wordo bendi pa yuda Fundacion Centro Man na Obra{/gallery}
