ORANJESTAD (AAN): Un grupo di hoben comprometi tabatin e oportunidad pa discuti educacion relaciona cu naturalesa y
participacion di hobennan den conservacion di naturalesa durante e Simposio pa Hoben riba Educacion Naturalesa organiza pa Dutch Caribbean Nature Alliance (DCNA) como parti di nan convencion anual.
Participacion di hobennan
Un di e prioridadnan di DCNA y e organizacionnan ta pa stimula participacion di hobennan den nan trabao di salvaguardia naturalesa na e islanan Caribense di Reino Hulandes. Despues di un programa di intercambio exitoso pa hoben durante e convencion na aña 2019, e expectativanan pa e simposio di e aña aki tabata halto. Presidente di directiva di DCNA, señora Hellen van der Wal ta kere firmemente cu “e generacion mas jong tin un futuro awe. Nan tin un voz y nos mester scucha nan.” E simposio pa hoben cu recientemente a tuma lugar durante e convencion di DCNA a enfoca riba educacion riba naturalesa y e Agenda 2030.
Un total di 17 participante entre 15 y 23 aña tabatin e oportunidad pa discuti riba nivel strategico con nan kier mira conservacion di naturalesa desaroya riba nan isla, kico nan kier pa gobiernonan compromete mas cu conservacion di naturalesa y con nan ta mira nan bida y nan ta mira cu cambio di climatico lo impacta nan bida y nan medionan pa sobrevivi.
Preparacion extenso
Prome cu nan a discuti e topiconan di dia y a prepara nan conclusionnan, e participantenan a pasa den un temporada di preparacion cu a dura tres luna. Nan a siña mas riba medioambiente en general. E Metanan pa Desaroyo Duradero (“SDG”) y tambe nan a desaroya nan habilidadnan pa debate. E topiconan specifico cu nan a prepara pa discuti tabata medioambiente en general, bida bao awa, cambio climatico y educacion relaciona cu naturalesa.
Programa di e simposio
Señora Sietske van der Wal, representando Aruba National Parks Foundation, a yama e participantenan bonbini. E discurso principal tabata na encargo di Dahlia Hassell-Knijff, responsabel pa proyecto na DCNA. Dahlia a cuminsa su carera den conservacion di naturalesa como mucha di 7 aña na Saba. Despues di su discurso, señor Elton Villareal a guia un discucionn entre e hobennna. Na final, nan tabatin oportunidad pa presenta nan conclucionnan na Su Alteza Real Prinses Beatrix di Hulanda, patrono di DCNA.
Na caminda pa 2030
Den publico a reina un interes notabel pa e diferente puntonan di bista cu e hobennan a trece dilanti. Nan a presenta tres proposicion: un campaña di concientizacion, un iniciativa pa limpieza semanalmente (Cleaning Sundays) y un conseho pa hubentud pa atende asuntonan di medioambiente.
Sr. Tadzio Bervoets, direktor di DCNA, a cera e atardi bisando: "futuro di conservacion di naturalesa ta pinta sumamente briyante."
“Generalmente hobennan tin un interes grandi pa siña. Despues di mira e discusionnan, nos ta mas motiva ainda pa prepara un programa inspiracional y educativo otro aña pa nan.”, Achsah Mitchell di St. Eustatius National Parks a comenta. E siguiente encuentro oficial cu hobennan lo tuma lugar den luna di maart na St. Eustatius.
Riba Potret adhunto, Prinses Beatrix hunto cu e participantenan di Young Ones United To Heighten Curaçao (YOUTH-C)
