ORANJESTAD (AAN) -- Otro punto di atencion cu Minister Dangui Oduber a menciona, pa loke ta su vision y maneho di turismo pa e periodo 2021-2025,
ta e diversificacion di Aruba su mercado turistico. Gobierno ta bay sigui enfoca pa diversifica e mercado na Merca mes. Merca ta hopi grandi y den e prome periodo nan a bin caba cu vuelonan for di Dallas, Chicago, Newark y awor ta explorando e mercado di Denver.
Na Latinoamerica, a caba di anuncia vuelo director cu Sarpa for di Barranquilla y Medellin, y pa aña 2022 lo tin mas vuelo directo for di Colombia, sin lubida Europa for di unda ya caba a anuncia un vuelo director for di London, cu pa motibo di pandemia esaki a wordo cancela, pero cu lo bay wordo reactiva. Tambe lo tin un vuelo directo for di Brussels, Belgica, pues Aruba ta bezig ta amplia su horizontenan diversificando su turismo. Pa ultimo, ministerio di turismo ta bezig trahando pa elimina e asina yama “red tape”, ta bay reorganiza henter e terminologia Hotelvergunning, pa Horeca. Ya caba a haci un estudio con pa automatiza, digitaliza henter e proceso pa ora un inversionista haci su peticion, con e mes por bay sigui e tramitacion, wak unda e ta pega, ki dia e ta bay haya su permiso.
E minister a bisa cu tur esaki ta pa stimula Aruba su economia, y gobierno ta mira e cuater añanan nos dilanti hopi positivo cu un turismo creciente y solido, duradero, sostenible, y ta mira pa e contribucion tambe pa Aruba su economia, cu tur e recursonan cu ta genera pa medio di turismo, wordo reparti na e forma di mas igual posible.
“Nos ta hopi positivo, nos ta mira un futuro hopi briyante nos dilanti, despues di temponan sumamente dificil, nos ta proyecta cu ya caba pa aña 2022 nos ta bay recupera mas cu 100% di nos turismo en comparacion cu aña 2019”, e dignatario a conclui.
