DTI y WEB Bonaire a bishita Elmar pa conoce nan operacion den smart grid y energia solar

ORANJESTAD (AAN): Recientemente NV Elmar a ricibi bishita di un delegacion consistiendo di representantenan di DTH (DTI) Bonaire, WEB Bonaire y DTI Aruba.

DTH Bonaire ta encarga cu inspeccionnan electrico na Bonaire, mientras cu WEB Bonaire ta responsabel pa generacion y distribucion di energia electrico riba e isla. E bishita a brinda e delegacion e oportunidad pa conoce mas tocante e desaroyonan y avance cu ELMAR a realisa den sector energetico na Aruba.

Durante e programa, e delegacion a ricibi un presentacion y un tour di e facilidadnan di ELMAR. Como parti di e presentacion, ELMAR a comparti resultado y experiencia obteni durante implementacion di su Smart Meter and Grid Project, cu a contribui na Aruba ta actualmente 100% smart meter.

Ademas, ELMAR a comparti su experiencia cu implementacion di su policy pa energia solar, introduci na 2012 como un paso innovativo den e transicion energetico den nos region.

E bishita a crea espacio pa dialoga tocante desaroyonan tecnologico, regulacion, inspeccion y operacion den sector electrico, y a reafirma e importancia di cooperacion regional pa sigui fortalece e sector energetico den Caribe Hulandes y Aruba.

N.V. ELMAR ta gradici e delegacion di DTH Bonaire, WEB Bonaire y DTI Aruba pa nan bishita, y su Team di Inspection pa nan contribucion y hospitalidad durante e programa.