Director di Aduana, Roderick Croes:
- Aduana su responsabilidad ta pa cobra impuesto di importacion riba vehiculonan
- DTI su rol ta pa keur vehiculonan cu ta permiti pa circula riba caminda publico
ORANJESTAD (AAN): “Mientras no tin un prohibicion di importacion (invoerverbod) riba cierto producto, Aduana ta permiti su entrada, semper cu e impuesto di importacion (invoerrechten) wordo paga. Aduana ta retene solamente productonan cu tin un prohibicion di importacion, of productonan cu mester di un permiso special pa drenta Aruba, manera remedi y arma”, asina Director di Aduana, señor Roderick Croes, a declara durante un entrevista recien.
Señor Croes a splica e diferencia entre e leynan relaciona cu keuring di vehiculo y e leynan di Aduana informando cu si Dienst Technische Inspecties, conoci como DTI-Keuringslokaal, tin exigencianan cu cierto vehiculo mester cumpli cune pa por circula riba caminda publico, esaki no necesariamente ta nifica cu e vehiculo no mag di drenta Aruba.
Como ehempel, señor Croes a menciona autonan di karting. E vehiculonan aki no ta cumpli cu e exigencianan di DTI pa circula riba careteranan publico y tampoco nan ta paga impuesto relaciona cu number di auto na Departamento di Impuesto. Sinembargo, no tin un prohibicion di importacion riba nan. Pa e motibo ey, Aduana por permiti nan entrada, ya cu nan ta destina pa wordo uza solamente riba lugarnan specifico.
E mesun principio ta conta pa otro tipo di vehiculo cu no ta apto pa circula riba caminda publico, entre otro steps, pasobra nan no ta cumpli cu e exigencianan tecnico necesario pa pasa keuring.
Señor Croes a enfatisa cu no ta responsabilidad di Aduana pa recomenda cua vehiculo of producto un persona mester importa. “Responsabilidad di Aduana ta na frontera: controla kico mag of no mag di drenta Aruba y cobra e impuestonan di importacion y accijns aplicabel riba e productonan importa”, el a reitera.
Pa loke ta trata e leynan y exigencianan cu ta cay bou di responsabilidad di DTI, ta e departamento aki mester informa y conscientisa ciudadanonan tocante cua vehiculo por wordo importa y cua ta permiti pa circula riba careteranan publico.
Alavez, señor Croes a indica cu ciudadanonan tambe tin nan mes responsabilidad. Prome cu importa cualkier auto of otro tipo di vehiculo, nan mester informa nan mes debidamente y verifica si e vehiculo lo haya permiso pa circula riba careteranan di Aruba.
“Pasobra pakico importa un auto of cualkier otro vehiculo, si despues bo no por core cune riba caminda publico?”, señor Croes a conclui.
