Diseñador local Quiana Cronie a gana 'Rising Star 2025'

Aruba Fashion Week

ORANJESTAD (AAN): Aruba Fashion Week, den colaboracion cu New York Fashion Week FDLA (Fashion Designers of Latin America), ta anuncia cu orguyo cu Quiana Cronie, director creativo di e marca di moda Cashaca, ta e ganador oficial di e Rising Star Award 2025.

E reconocemento distingui aki ta otorga despues di un evaluacion oficial durante e Aruba Fashion Week 2025, realisa pa Albania Rosario, CEO di New York Fashion Week FDLA, como parti di e Emerging Talent Support Program pa Latinoamerica y Caribe. Su presencia y liderato visionario a destaca un compromiso comparti pa eleva diseñadornan cu un fuerte identidad cultural y potencial global.

"Sostene talento nobo di Latinoamerica y Caribe ta den e curazon di e mision di FDLA," Rosario a bisa. "Nos colaboracion cu Aruba Fashion Week ta permiti nos identifica bosnan autentico y duna nan acceso real na plataformanan internacional. Hunto nos ta construi brug cu ta permiti diseñadornan emergente di e region soña mas grandi y drenta e scenario global cu confiansa".

Despues di un evaluacion profundo realisa hunto cu su comite di curator—consisti di President Honorario José Forteza y Madrina di FDLA Agatha Ruiz de la Prada—e hurado a selecciona e diseñador cu su obra ta refleha di manera mas fuerte un preparacion internacional, mientras cu ta expresa di manera autentico e ADN di Aruba.

E proceso di seleccion tabata hopi competitivo. Tambe a participa e diseñador local iconico Ronchi de Cuba cu su coleccion “Un Dia na Aruba”, mescos cu e talento consolida di Andrew Steba cu su coleccion “Mondi Mistico” (Bosnan Mistiko). E forsa, diversidad y madurez di e coleccionnan aki a haci e decision final excepcionalmente dificil y a enfatisa e profundidad di e excelencia creativo cu ta surgi for di Aruba.

Finalmente, e comite a scoge di manera unanime Quiana Cronie pa su coleccion “Sopi Aw’i Playa”. Su trabou a destaca pa su base conceptual impecabel, ehecucion refina y storytelling poderoso, posicionando e como un bos distintivo y cu credibilidad den moda contemporaneo.

Como parti di e colaboracion prestigioso aki, Aruba Fashion Week y New York Fashion Week FDLA lo hiba e talento, vision y esencia creativo di Aruba na e epicentro global di moda: e pasarelanan di New York Fashion Week, cu lo tuma luga for di 12 te 17 di februari 2026, na New York City.

E presencia di Quiana Cronie na New York Fashion Week ta representa mas cu un logro personal; e ta tambe un plataforma poderoso pa posiciona Aruba den un di su mercadonan internacional mas prominente. Su participacion ta contribui na mustra e isla como un destinacion cu ta bay hopi mas leu cu su playanan renombra—un destinacion cu ta brasa moda, estilo di bida di luho, creatividad y bienestar. A traves di diseño, storia y expresion cultural, Aruba ta presenta como un centro sofistica y progresivo di bida contemporaneo riba e scenario global.

"Mi ta hopi gradici pa e oportunidad aki y pa e confiansa pone den mi trabou", Cronie a bisa. "E momento aki ta recorda mi cu bini di un isla chikito no ta limita con grandi bo por soña. Mi ta orguyoso di representa Aruba y entusiasma di hiba Cashaca na e siguiente nivel riba un escenario internacional".

Aruba Fashion Week ta felicita Quiana Cronie pa e logro remarcabel aki y ta spera di sigui sostene su asenso riba e escenario global di moda. «E reconocemento aki ta representa mas cu un premio; e ta un oportunidad pa mustra e excelencia creativo di Aruba riba un scenario internacional», a declara Angel Leon, director di Aruba Fashion Week. «E trabou di Quiana ta ilustra autenticidad, esencia cultural y un idioma di diseño orienta riba futuro cu ta resona hopi mas leu cu nos fronteranan».

Mirando pa dilanti, Aruba Fashion Week ta reafirma su compromiso—hunto cu su partnernan local y internacional—pa sigui fomenta e crecemento di industria di moda y creativonan di e isla. AFW ta invita e talento emergente y ainda no descubri pa conecta, involucra y bira parti di e ecosistema den desaroyo aki via www.arubafashionweek.com.