Diasabra awor e lidernan prominente ta colabora y lansa Momentum Men’s Seminar

Cuminzando 2022 cu enfoke y determinacion

ORANJESTAD (AAN): Cu e solo meta pa empodera hende hombernan den nos comunidad y yuda nan yega na nan siguiente nivel den bida, 5 lider prominente riba e tereno a bini hunto y ta lansa seminario pa hende hober titula, Momentum Men’s Seminar.

   Un conferencia diseña pa primeramente yuda nan descubri nan potencial individual, cu ta e fundeshi cu ta dirigi nos pa alcansa nos destino. Ofreciendo guiya pa hende hombernan cu entre otro, kizas por a lanta sin un relacion paternal percurando asina pa un falta di siguransa propio.

   Intencion ta, pa trece claridad posibel den areanan di confusion y falta di siguransa pa asina haci nan soñonan bira realidad pa loke ta nan potencial como empresario, lider of comerciante cu nan a worde diseña pa ta.

   Ta trata aki di Coachnan, Harold F. Grant, Dave Martinus, Raymond Maxwell, Francis Groeneveldt y Rene Wild, cada un experto riba nan tereno di experticio.

   Harold F. Grant - Fundador di Corporate Impact y un lider prominente den nos comunidad specialisa den area di famia y particular e hende homber encabesando y liderando su famia, su negoshi, carera y cada area di su bida di manera conkistado, cu enfoke pa fortalece e pilarnan clave pa logra exito pa nan mes y consecuentemente, Aruba su futuro generacionnan.

   Dave Martinus, experto certifica den comercio, fundador di ActionCOACH Business Coaching y facilitador certifica pa e programa di desaroyo corporativo yama ADDINGZEROS cu tin como enfoke pa yuda individuonan amplia nan manera di pensa y bira exitoso den nan negoshi y carera creando asina e libertad necesario pa pasa tempo cu nan sernan keri.

   Raymond Maxwell, Facilitador Senior y licenciado oficial di FranklinCovey Caribense Hulandes y director di EduMax Training & Consultancy. Un graduado mediador registra - NMI di 'Nederlands Mediation Instituut’ y ta hopi activo riba e tereno di liderazgo ofreciendo ayudo personal y profesional alcansando asina metanan y resultadonan desea. 

   Coach Francis Groeneveldt, experto certifica riba tereno di liderazgo y finanzas di Lead2Success particularmente specialisa riba e tereno di ‘Financial Freedom’ cu ta enfoka pa sanea situacionnan di debe y construi structuranan nobo pa logra sali for di cualkier situacion negativo pa uno positivo y asina posiciona individuonan riba e caminda di exito.

   Y pa loke ta trata inteligencia fisico (algo sumamente necesario pa un mente conkistado) Instructor fisico y Nutricionista, Rene Wild di ‘Wild Fit,’ lo bay ta compartiendo su experticio pa asina percura pa un curpa y mente fisico halto den energia y determinacion pa alcansa nan metanan.

   Un mainta poderoso pa ranca sali 2022 cu hopi energia, enfoke y determinacion cu lo resulta den un clausura cu puro exito. E mainta lo inicia pa 10or di mainta y ta programa pa termina 12or di merdia.

  DIARIO a compronde cu e Momentum Men’s Seminar lo tuma lugar Diasabra  15 di januari venidero, den edificio di Corporate Impact Ministries situa na Caya G.F. Betico Croes. Henter e ‘line-up’ yena cu rikesa intelectual lo bay ta literalmente un regalo pa e lidernan, cabesante di famianan di nos comunidad, ya cu e lo bay ta uno completamente gratis.  Bo tin di registra di antemano via website di eventbrite.com y busca e evento di ‘Momentum Aruba’.