ORANJESTAD (AAN): Diaranson madruga, hendenan a mira un ‘flash’ masha fuerte mes den cielo,
y inmediatamente coriente a bay den varios bario den zona di Westpunt, Rooi Santo, Tibushi, Topaz, Safir, Ruby, Esmeralda, Boroncana, Sero Pela.
A resulta cu chauffeur di un Hyundai Grandi i10 color shinishi cu number V-4239 a perde control riba su stuur, a baha di caminda y a bay dal fuertemente riba un palo di luz di voltahe halto.
E impacto aki a kibra e palo di luz den tres pida, y esaki a pone cu un transformer tambe a bin abao y dal kibra abao riba caminda. Ora cu e transformer aki a explota, el a ilumina full e cielo pa fraccion di seconde e momento ey.
Debi na e impacto, un pasahero sinta dilanti sin seatbelt a bay dal cu su cabez fuertemente den windshield y a kibra e glas.
Polis como tambe Ambulans a yega eynan pa duna yudanza. Como cu tabatin waya benta tur caminda, agentenan a cera e caminda.
Personal di NV Elmar a yega y a haya nan cu e trabao grandi di bay kita e palo di luz, pone uno completamente nobo, y instala un transformer nobo, pone wayanan bek, y warda pa e instalacion haya keuring, pa finalmente pone coriente bek. E area ey net rond di e lugar di accident a keda como 5 ora sin coriente. Te Diaranson mainta despues cu solo a sali, coriente a bin bek.
