Gobierno mester tene na ley cu ta base di conflicto cu sindicato --- Kibra Ley di Contabilidad den pasado ta base di accion di awe --- E balansa legal di Aruba den estado di bancarota y pandemia
ORANJESTAD (AAN)- Aruba ta un Estado di Derecho. Un situacion maximo cu a haya expresion na momento cu un Pandemia a azota mundo, cu mester a regresa na su leynan basico cu democracia ta impone.
Awe, manera por a spera, personal na departamentonan di Gobierno a tene accion.
Na diferente forma DIARIO a atende cu e situacion cu a presenta. Nos a analisa entre otro e momento cu sindicatonan a scoge pa defende entrada di trahadornan di Gobierno, cu a wordo perhudica cu prueba, for di 2009 ora Mike Eman a uza nan siguransa di pago pa baha OB y asina hunga politica.
For di e momento sindicatonan di Gobierno mester a drenta accion, pasobra Mike Eman a deshaci di nan fuente di siguridad di entrada. Nan a keda keto.
Nan a mantene silencio ora debe nacional tabata crece y asina Aruba a wordo hiba pa estado di bancarota.
Na 2017 Aruba tabata den estado di bancarota y bou supervision Hulandes. For di e momento, e sindicatonan tabata na haltura cu legalmente nan entrada tambe tabata na peliger.
Si Hulanda no a yuda Aruba cu placa, lo no tabata tin placa pa paga e trahadornan. Cifranan ta duna prueba di esaki.
Gobierno Eman a ciega Aruba cu proyecto Citgo cu tabata un fantasia total cu sindicatonan di Aruba mester a descubri na tempo. Sindicatonan a mantene silencio.
Ta e silencio di sindicatonan a haci cu nan placa ta na peliger. No nan placa so. Pero placa di tur trahador di Aruba y pio ainda, placa di henter Aruba, cu mester depende di Hulanda pa sigui dilanti.
Pues sindicatonan no a actua cu e prome calamidad, cu tabata destruccion di Status Aparte financiero di Aruba, cu a perde su autonomia manera Statuut ta permiti.
Legalmente Hulanda a haya derecho pa dicidi kico ta pasa na Aruba cu placa pasobra mester paga Hulanda tur e placa cu awe Hulanda tambe mester.
Na 2020 Hulanda no por a haci wega mas ora Covid-19 a crea un estado di emergencia pa Aruba.
E calamidad financiero cu a rementa na 2017 dor di abuso financiero di placa di Aruba dor di gobierno Mike Eman, a topa cu e calamidad di e Pandemia Covid-19 cu a hinca Aruba den un situacion di emergencia, cu a kibra normalidad legal tambe.
Democracia, e libertad di hende di subi caya ora e kier, a stop di existi. Toque de Queda ta prueba di e estado di emergencia cu Aruba a conoce y cu a haci cu mester a introduci condicionnan di guera na e pais.
Aruba a keda sin economia cu ta un calamidad. Aruba no tabata tin entrada mas. Den e situacion di calamidad financiero cu ta a cuminsa ora Gobierno Mike Eman a abusa di placa, e base legal di e pais ta exigi Gobierno tuma e medidanan cu ta necesario pa e pais no wordo destrui financieramente pero tambe riba tereno estatal.
Un Aruba sin placa no por paga ni trahador, ni su servicionan, nada! Un Aruba sin placa ta bancarota.
Ningun hende kier perde nan entrada. Pero den sector priva for di 2020 mayoria di ciudadano a bay atras den nan entrada.
Den un estado di emergencia, Gobierno mester baha su gastonan. E no tin placa pa paga.
Mientrastanto a cuminsa traha riba recuperacion. Proyectonan nobo ta bati na porta.
“Te proximo aviso” Gobierno no por paga salarionan actual di sindicatonan pa cual Gobierno no a cera porta.
Nan por bin sinta cu Gobierno y scucha te ki dia no por paga e salarionan actual mas.
Pues por sinta ainda na mesa, loke ta nifica cu sindicatonan por papia ainda cu Gobierno cu no por dicidi sin mas riba placa di Pueblo.
Ley di Contabilidad ta exigi pa placa di Pueblo wordo gasta segun ley, cu ta exigi pa tin mas entrada cu gasto como base di un bon gobernacion.
Ley no ta permiti un gobierno gasta placa cu e pais no tin ni paga salarionan cu e pais no por paga.
Gobierno Wever-Croes a wordo eligi segun ley cu un agenda conoci pa votadornan. E mester traha segun ley y e plannan cu tabata conoci prome cu eleccion y como e lider cu for di encuestanan, Aruba a proclama favorito pa dirigi e pais cu tur plannan cu el a trece dilanti.
Aruba ta un estado legal y como tal mester atende e situacion!
