Diabierna awor tin Festival Canto di Mucha pa Mucha na Colegio Laura Wernet-Paskel

Evento grandi na Kadushi Largo

ORANJESTAD (AAN): E docente- y alumnonan di Colegio Laura Wernet-Paskel di Kadushi Largo ta preparando pa un fabuloso Festival di Canto cu lo tuma lugar Diabierna awor, 18 di November 2022.

   Cabezante Bernadeta Figaroa-Geerman a indica cu nan ta preparando pa e Festival aki, y tur e idea a bin den cuadro di concientiza hendenan riba e Dia Internacional pa Derecho di Mucha, y asina lo bay yuda pone spotlight riba e concientizacion riba e derechonan aki di mucha durante e Festival.

   Pues e ta un actividad, unda e muchanan mes ta bay canta pa muchanan!  Segun cabezante Figaroa-Geerman, lo cobra djis 5 Florin en general pa entrada, y mucha di e scol ta paga 2 Florin so.

   E cabezante a duna un hint, cu varios miembro di organizacion ta contento con tur cos a bay y nan ta ancioso pa Diabierna awor caba!  E gran noticia ta cu e fenomenal Grupo di De Trupialen a train cu e muchanan pa basta tempo caba, y specialmente ta siña nos cancionnan di cultura di Aruba.

   Kimberly Croes kende ta docente, formando parti di Comision Festival Canto di Mucha pa Mucha, na su turno tambe a invita pueblo, y specialmente esnan di distrito Santa Cruz pa bin presencia e actividad aki.

   El a splica, cu si acaso Diabierna awor 18 di November, awa yobe, nan tin Plan-B cla caba, esta cu lo muda full e actividad bao overdekte gymzaal unda tur 12 participante por bay sigui canta.

   Docente Mirenne Croes di e Comision, a bisa cu ta celebra Dia Internacional Derecho di Mucha, y Colegio Laura Wernet-Paskel ta festeha su di 60 aña di existencia.

   Nan ta gradici Maybelline Arends-Croes cu a yuda nan cu e cancionnan, y e akoordnan tambe cu nan tabatin mester.

   Meneer Elmer ‘Lem’ Pieters tambe hunto cu De Trupialen ta acompaña e muchanan.  Ora cu e Comision a acerk’e pa mira con por pone e Festival di Canto hunto, mesora el a duna su cooperacion.  Pasobra esey semper ta e meta di De Trupialen, esta pa duna bek loke nan a yega di haya tempo nan tabata chikito.  Trupialen tur a sali di scol, y aki Frere y otro dirigentenan a escoge muchanan pa forma De Trupialen.

   Mesora cu mil amor, Pieters a bay di acuerdo pa yuda Colegio Laura Wernet-Paskel pa duna training.  E ta aplaudi e muchanan, como cu nan ta balente y ta canta bon.  Pieters a bisa danki na cabezante cu a duna confianza den De Trupialen pa realiza e soño aki cu e comision tabatin.

   Bin apoya e muchanan, bay demostra cu nos ta interesa den loke nan ta haci.  E muchanan ta entusiasma, y tur hende ta wordo gradici cu a haci esaki posible.  Masha danki di curazon di parti di famia grandi di Colegio Laura Wernet-Paskel.

   Despues di esey, tabatin sacamento di lot pa mira ki number e 12 cantantenan lo ricibi.  Nan ta spera apoyo di tur nan klas pa e actividad aki.