ORANJESTAD (AAN): Director di SVb, Edwin Jacobs, a indica cu ainda no tin den bista di SVb loke ta e malesanan cu ta treciendo mas reto actualmente pa e fondo di e organisacion.
El a bisa cu e malesanan cronico ta sigui aumenta. Loke ta Diabetes y malesanan di curason ta sigui aumenta na Aruba anualmente.
Na final di dia, e malesanan cronico ta afecta SVb. Diabetes ta trece cu ne cu hende tin cu bay opera bista. Malesa di curason ta traduci su mes den AO.
Den e seguro di malesa tin un articulo di expiracion di 2 aña cu ta bisa cu pa un tipo di malesa cu tin un maximo di 2 aña cu por meld AO. Esey den principio ta proteha e fondo, pero e ta pone e trahador cu despues di 2 aña ta bira dificil pa e haya un trabao, Edwin Jacobs a señala.
Prevencion no ta parti di e trabao di e fondo, pero nan ta duna un contribucion ya cu e fondo no ta dirigi pa preveni. E fondo ta dirigi pa percura pa tin placa pa paga ora cu tin malesa, a remarca.
E rumor cu SVb no ta pagando e companianan no ta berdad, a expresa. E aña aki, a paga casi dobel di loke a paga na 2019. Tin e fondonan, ta paga e companianan cu tin cu haya nan compensacion pa dianan di AO. Nan ta manda e emailnan pa pidi, SVb ta controla y ta paga, Jacobs a bisa.
