Diabierna awor e Bingo di Club Caiquetio ta bek

ORANJESTAD (AAN): Club Caiquetio ta cla pa ricibi su fiel hungador nan di bingo diabierna anochi pa e grandioso bingo.

Despues di a anuncia su regreso di bingo den club, Sr. Joy Fingal secretario general a informa cu e ta masha contento y satisfecho cu e reaccionnan positivo y di alegria di pueblo en general. Muy particularmente nos grandinan cu tabata custumbra di hunga bingo fielmente tur siman den Club Caiquetio.

Despues di 2 aña sin por organisa bingo den club, porfin  Diabierna awor Bingo ta bek.

E biaha aki si mester a tene na cuenta cu regla nan cu tin vigente di parti gobierno, caminda cu club por ricibi no mas cu 400 persona. 

Tur esnan cu a haci nan reservacion di mesa, ta hunga bingo den club of por scoge tambe pa keda cas y hunga bingo den ambiente familiar.

Probecha di e ultimo dia nan cu a keda pa cumpra bo bingo y participa pa gana 10 mil florin di e full card. Mas di Afl.15 mil florin na premio efectivo tin pa reparti den 10 wega di bingo. Ta conta cu bo sosten y aporta na Club Caiquetio, bo cas di Bingo aki na Aruba.

Dia 26 di November ta bira e promer bingo den club, of por keda cas y hunga bingo atravez di Canal 22, Radio Top FM 95.1 y Facebook page di Club Caiquetio. Ariba cada carchi di bingo, tin tur informacion y regla nan di bingo Club Caiquetio! Corda ora cu bo gana, Bo mester yama den aire pa verifica bo carchi ganador.