Informacion insistente di DIARIO ta haya confirmacion mundial --- *Aruba mester drenta dianan di fiesta cu prevencion di un ola nobo --- *Ainda no tin bista riba cifra di personan cu a bira victima indirecto
ORANJESTAD(AAN)—Na un forma insistente DIARIO a sigui mustra Aruba cu e peliger di Covid-19 pa poblacion mundial, ainda no a termina y riba e peligernan cu ainda ta sconde y por presenta cualkier momento.
Hulanda ta prueba di un pais rico cu no por a frena e malesa debi na e resistencia popular pa tuma medidanan apropia y manipulacion di informacion di parti di personanan cu kier opone e vacuna, cu ta duna prueba di ta scapa bida di hende y baha e posibilidad di infeccion.
Mientras booster shot ta wordo administra na Aruba tambe awor, na Hulanda e malesa a tuma proporcion sumamente serio cu tambe ta debi na e actitud di publico y tolerancia di parti di Gobierno Hulandes pa asina evita confrontacion serio cu personanan cu no kier vacuna.
E cantidad di casonan di Covid-19 na Hulanda sigur a crece debi na e forma cu personanan tabata pidi pashentnan di Covid-19 pa infecta nan pa asina nan tin inmunidad sin ricibi e vacuna.
Un lockdown total por wordo decreta na Hulanda y tin informacion cu unlock down lo por dura basta dia na e pais.
Kico ta spera Aruba, ta sigur e pregunta pa cual DIARIO ta busca contesta mescos cu pa e pregunta si Aruba por carga e peso di otro ola di e Coronavirus nobo.
AZV na diferente occasion a splica e gastonan pa pashent cu Covid-19 a representa.
Mas informacion mester bini riba e asunto di gran preocupacion cu mester wordo presenta na Pueblo di Aruba cu mester comprende e resultadonan grandi cu un brote nobo di e pandemia por tin pa e pais.
Expertonan ta mustra riba e problema financiero serio di Aruba pa por enfrenta un ola nobo cu na nan opinion por aplasta e pais.
Diariamente ta wordo demostra na mundo cu e presencia di personanan cu no kier vacuna, ta keda fuente di e peliger mas grandi pa e malesa plama den tempo record.
Kico esaki lo nifica pa Aruba cu mester a haya ayudo tecnico pero tambe financiero pisa di Hulanda pa e pais por a sobrevivi? Kico e gastonan total cu Covid-19 a representa pa Aruba ta?
Cu tur ciudadano mester yuda pa evita cu Aruba lo conoce un brote nobo, ta un hecho. E pregunta grandi ta keda si medidanan mester wordo tuma pa duna mas proteccion na personanan cu kier evita morto of resultadonan di bida largo di e malesa.
Te awe tin preguntanan importante cu no tin contesta. Por ehempel cuanto persona a bira victima indirecto di Covid-19?
Hospital ta prepara pa tuma medida atrobe si e malesa menasa. Cuanto hende a wordo perhudica dor di e ocupacion di hospital cu e prome olanan a exigi?
Cuanto persona a mira nan salud afecta pa motibo cu nan no por a ricibi cuido medico necesario na hospital segun schedule?
E realidad di pashentnan indirecto di Covid-19, personanan cu no por a haya cuido na tempo, ta un discusion internacional serio.
Mes serio ta e realidad di e menasa cu Covid-19 ta sigui forma pa regreso na bida normal y pa calidad di bida di hende.
Kico lo pasa cu Aruba si no tin cooperacion den prevencion? E pais lo por soporta un lockdown nobo? Cuanto medidanan mas lo mester tuma?
Pregunta y mas pregunta mientras tin un realidad, cu mundo no a bolbe na normal na final di 2021 cu a trata di deshaci di miedo pa Covid-19, cu awe ta bira motibo pa paisnan bolbe cera school y bolbe na lockdown cu tur su resultadonan pa por menasa henter mundo, incluso Aruba, si tur hende no coopera.
