ORANJESTAD (AAN) — Sharline Koolman, Hefe di Departamento di Malesanan Contagioso na Departamento di Salud (DVG),
a elabora den conferencia di prensa, tocante e yegada di e barco crusero cu ta den porta y con e control riba salud di e pasaheronan ta tuma lugar den e barco, conforme e normanan di DVG, y con e comunicacion tocante esaki ta sosode 72, 48 y 24 ora cu e barco yega waf.
Koolman a comenta cu DVG a haya varios pregunta, kico Salubridad Publico ta bay haci cu esaki. Normalmente, prome cu Covid-19 ya caba, ora un barco crusero ta drenta Aruba DVG ta haya loke nan ta yama “Maritime Declaration of Health”.
Kiermen, cu nan tin cu manda un declaracion 48 ora prome cu e barco drenta, splicando kendenan tur ta malo riba e barco y kico nan tin. “E por bay desde e bon conoci ‘Norwalk Virus’ cu nos ta yama virus gastrointestinal, cu ta duna diarea, sacamento, etc., bo ta haya griep, influenza riba barco caba, pero cu ta wordo controla bon door di e sistema cu tin riba e barconan. Nan tin na isolacion, cuarentena, y tur esey.
E intencion aworaki ta controla si covid-19 ta bin acerca. Tur e otro malesanan ta wordo monitorea y no tin cambio riba esey. E ora ey nan tin cu yena e formulario pa nos y aworaki locual a cambia ta cu nan tin cu manda 72, 48 y 24 ora prome cu nan drenta waf di Aruba.
A base di esey Departamento di Salud Publico ta duna advies na Directie Scheepvaart y tambe na e Haven Meester, cu e barco ta o.k y cu e barco por drenta Aruba.
Na momento cu e drenta DVG lo ta presente tambe, pa controla. Nos controlador y nos consehero medico lo tey, pa controla si tur cos ta cuadra cu locual nan a manda den e informe. E ora ey por duna ok pa e personanan cu por baha.
El a reitera cu no ta solamente Covid-19 pero por tin hende cu otro sorto virus, manera gastritis intestinal, den e barco y e ora ey nan no por baha. Pues, nos lo controla esey tambe”, Sharline Koolman a subraya.
