Tur Arubiano di tur color politico ta victima di un realidad silencia --- *Parlamento mester ahusta e Ley cu ta dicidi con ta gasta placa --- *Abusa di placa di Pueblo mester wordo mara na castigo pisa
ORANJESTAD (AAN) — Aruba a cera 2021 y habri 2022 cu un ambiente cu ta stroba e pais sigui cana den un mundo di problema serio causa pa e pandemia entre otro.
Un bom a rementa for di momento cu Aruba mester a cuminsa ahusta su gastonan no solamente pa motibo di e pandemia.
Politica a bira e instrumento pa Pueblo scoge su Gobierno segun e sistema democratico.
Politica cu ta depende di honestidad y mucho mas di cada persona cu bini dilanti y bisa cu e kier traha pa Pueblo.
Leynan ta tene na bista cu no ta tur loke ta wordo papia ta berdad y cu politica conoce tambe hende cu no ta practica di sinceridad pero ta abusa di nan poder pa asina alcansa nan aspiracionnan personal.
Documentonan ta duna prueba cu esaki sigur a pasa cu Aruba cu na 2009 a entrega e pais na Gobierno di Mike Eman, na un momento cu mundo henter y tambe Aruba tabata pasa den un crisis cu tabata exigi responsabilidad grandi di cada dirigente politico.
No tabata responsabilidad pero astucia politico cu a dirigi Mike Eman, cu a uza e necesidad pa introduci medida pa aumenta entrada di e pais, pa e yega na poder na un momento cu su partido tabata te na suela pa motibo di e escandalo Fondo Desaroyo Nobo Aruba, cu a manda miembronan di partido di Mike Eman prison.
E promesa falso di Mike Eman cu e ta deshaci di BBO, a haci cu Pueblo a kere den su palabra.
Placa di Pueblo a wordo abusa na tur forma dor di Mike Eman, un manipulador politico manera portretnan y documentonan ta duna prueba.
Mike Eman por wordo yama e mihor manipulador politico di Aruba si mira resultado di su obranan, cu a crea un mundo di fantasia pa Aruba, den cual e por a hunga dirigente “stima” dor di un Pueblo cu el a laga sin futuro despues cu el a destrui herencia di e pais.
Aruba a lucha pa su Status Aparte, contra cual e partido di Mike Eman a opone hasta na Mesa Redonda.
Aruba a lucha pa su autonomia financiero pa e bienestar di Florin Arubano, cu ta uno di e herencianan mas importante di Aruba.
Mike Eman conscientemente, manera tur rapport a demostra a kibra Aruba. E a destrui bienestar di Aruba cu e debe nacional cu el a laga atras ora conscientemente el a deshaci di entrada di e pais contra tur advertencia di expertonan oficial di e pais.
Awe Aruba ta den gara di otro problema cu Mike Eman a laga como herencia cu ta e acuerdonan cu el a firma pa mara Aruba na pagonan imposibel den futuro.
Aruba ta wordo confronta cu intrankilidad cu ta afecta bienestar di e pais, cu a mira su bienestar financiero destrui.
E Ley di Contabilidad ta splica na kico gobernantenan mester mantene nan mes ora nan ta atende cu placa di Pueblo.
Mike Eman a trapa cu dos pia riba e leynan aki ora el a kibra futuro financiero di Aruba pero tambe a mara e pais na pagonan di e pais.
Aruba tin e Ley di Contabilidad cu ta splica con un gobernante mester goberna e pais. E Ley cu ta splica con mester uza placanan di e pais na un forma consciente.
Awor kico ta pasa? Aruba, cu mester traha riba un situacion dificil di pandemia, mester mira con haci cu loke Mike Eman a laga atras mientras Mike mes ta trankil den su Penthouse.
E momento a yega pa Parlamento di Aruba atende cu e Ley di Contabilidad y habri porta pa un pais por actua contra gobernantenan manera Mike Eman cu a abusa di e confiansa di Pueblo, a destrui herencia y futuro di e pais, cu awe lastima y hereda mester mira con e ta sigui dilanti den un pandemia, den un crisis mundial y local nunca visto!
