ORANJESTAD (AAN): Recientemente Minister di Salud Publico Dangui Oduber den un carta a contesta miembronan di Parlamento di Aruba señora Wyatt-Ras y señora Lopez-Tromp riba
nan preguntanan haci tocante entre otro e Aruba Health App, e investigacion cu tin andando y procedimento di pagonan pa cu e PCR test.
Minister Dangui Oduber a mustra e miembronan di Parlamento riba e hecho cu ta Directie Volksgezondheid Aruba (DVG Land Aruba) ta doño di e Aruba Health App y tin full control di esaki. E Aruba Health App a keda desaroya hunto cu Setar NV.
A splica riba e hecho tambe cu no tabata tin tempo pa haci un destaho publico como cu Aruba ta pasando den un crisis y un destaho publico a tuma mucho tempo y ta pesey a opta pa uza nos compania estatal di Setar NV pa yuda desaroya e App.
Pa locual ta e investigacion cu ta andando tambe e miembronan di Parlamento a haya nan contesta. Minister Oduber a splica nan cu e 2 personanan cu ta ser investiga no ta ambtenaar y tampoco no ta of tabata coordinador di Minister Oduber, e personanan aki ta contractant cu land Aruba a contrata temporalmente pa traha den e crisis mesos cu hopi otronan.
Tambe e mandatario a contesta cu el a worde poni na altura di e iregularidadnan den e prome siman di oktober 2021. Na e momento ey el a instrui DVG pa haci un investigacion interno cual a sosode. Ora esey a keda cla y a haya sa ken ta e sospechosonan, a kita nan acceso, a pone nan riba non-actief y a termina nan contract.
E mandatario a meld na Ministerie Volksgezondheid, Welzijn en Sport (VWS) kico ta pasando y a instrui DVG pa entrega un keho na Ministerio Publico pa asina tin un investigacion penal.
Pa tur e preguntanan haci tocante e PCR test y ken ta ricibi e pago di esaki, Minister Oduber a contesta e dos Parlamentarionan lo siguiente. Tur pago di PCR test ta keda administra pa LabHOH, es decir personal di DVG no ta wak e transaccionnan aki.
Minister Dangui Oduber a contesta un total di 46 pregunta di cual 13 pregunta di señora Lopez-Tromp y 33 pregunta di señora Wyatt-Ras.
Minister Oduber semper a hiba un maneho transparente y ta spera cu miembronan di Parlamento Lopez-Tromp y Wyatt-Ras por tin un poco mas trankilidad awor cu tur nan preguntanan a keda contesta.
