Ministro Glenbert contestando Gunn di MAS
ORANJESTAD (AAN): Recientemente Parlamentario Aquanette Gunn di Partido MAS a manda un serie di pregunta na Ministro di Labor, Glenbert Croes.
DIARIO a nota cu Diaranson 12 di Januari 2022, cu Ministro Croes a manda un contesta, y a agrega raport di Departamento di Labor y Investigacion (DAO) riba e cifranan di mercado laboral 2020 cu a ricibi 10 di Januari cu a pasa.
Por a tuma nota den prensa cu pa fin di luna di november FASE ta yega na su final. Cu e meta ta pa pone tur trahado back na trabao y cu pa loke ta data [informacion di October 2021) ainda tin mas cu 2.000 persona ricibiendo e ayudo FASE. Relaciona cu e informacionnan ey, Parlamentario Gunn a haci e siguiente preguntanan.
(Pregunta 1). Minister por informa Parlamento kico lo sosode cu e grupo di personanan local of di nacionalidad hulandes di edad mas halto cu tin dificultad pa haya trabao debi cu comercio no ta tuma nan den servicio, sea por ehempel ta considera nan sobre cualifica oftinun prehuicio cu e personanan aki no ta productive y cu n'e momento aki ta hayando FASE?
Aki Minister di Labor a contesta cu e ta hay’e sumamente importante pa tur hende haya un oportunidad igual pa drenta e mercado labora; back. Ta e meta pa tur hende cu a perde trabao, of cu nan horario a worde reduci door di a ricibi FASE, por haya e oportunidad pa subi mercado laboral back bao mesun condicionnan cu antes.
Segun Ministro, nan ta haciendo un esfuerzo grandi pa medio di entre otro e plataforma Aruba Kier Traha, pa duna tur hende e estimulo necesario pa subi e mercado laboral back hunto cu dunador di trabao.
(Pregunta 2). Minister por informa Parlamento si tin un maneho stipula con lo bay atende.
Aki Ministro di Labor a contesta, cu el como Minister di Labor, conhuntamente cu e departamentonan concerni, a traha un maneho general pa henter e mercado laboral, sin exclui gruponan specifico. Ta importante pa como Minister di Labor
sigura cu tin oportunidad igual pa un y tur.
(Pregunta 3). Minister por comparti e plan di maneho cu Parlamento pa cu e grupo specifico aki?
Aki Ministro di Labor a contesta cu ta e tarea di Gobierno pa unda sea necesario, ofrece proteccion garantizando un mercado laboral balansa, stimula oportunidadnan laboral, promove derecho laboral igual, independiente di sexo, rasa, origen of religion. Y mediante leynan laboral regula y balansa, stimula
un bon relacion entre empleado y dunador di trabao. Na mes momento lo
percura pa un guia laboral general y transparente pa evita conflictonan
laboral.
