Delfin cu tabata den ‘shelter area’ na mei ultimo a fayece di un fayo di  curason

Giolina Henriquez di AMMF ta splica:

ORANJESTAD (AAN)-- Giolina Henriquez, di Aruba Marine Mammal Foundation, den entrevista cu Matutino DIARIO, a elabora tocante e standing cu tabata tin na Mei ultimo, pa duna cuido na un delfin den e ‘shelter area’ cu apesar di a ricibi cuido a bin fayece di un fayo di curazon.

Henriquez a splica cu AMMF Foundation su protocol ta pa semper duna oportunidad na un delfin cu ta den e ‘shelter area’, cu tin problema, pa bay bek afo.

“Esaki a tuma dos siman, y nos a haya ayudo di expertonan internacional, cu nos ta den contacto cu ne pa decadanan largo, pero despues di e dos simannan e delfin a fayece.

E reto mas grandi tabata pa haya cooperacion di e usuarionan di lama, specialmente e diferente tipo di botonan pa mantene distancia.

Por ehemplo, hopi hende no ta compronde cu un delfin ta vulnerabel pa diferente estimulo, no pa hende, pero pa animal si, y por ehemplo zonido, presencia di boto, y ademas e tin problema, naturalmente, di haya impacto di un boto, windsurf, etc”, señora Henriquez a duna di conoce.

El a agrega cu e informacion preliminar di un estudio cu a wordo haci, cu e kier comparti cu pueblo, ta mustra cu por ehemplo, necrosis cu nan a haci cu tres delfin, esun di e ultimo caso a resulta cu no tabata tin indicacion di ningun impacto, aunke berdad e tabata tin den un lugar cu hopi actividad, pero no tabata tin indicacion di esey, pero loke si tabata tin, ta loke ta wordo experiencia hopi den e area aki, ta cu e delfin tabata malo.

“E tabata tin un problema cronico di curazon, pa cual ya caba e tabata debil, e tabata tin infeccion halto, cu a hacie mas debil, pa cual a saca e conclusion cu e tabata aden caba. Anto a bin acerca e sonido di e pipanan cu ta metal riba metal, cu a pone nan bay den panico, y e ora ey tuma camindanan robes y pega strap. Stranding shock tambe ta un stress pa un animal cu ya ta bao di malesa. Esey tur hunto, nos a purba di yude, di tur sorto di manera, pero al a bin fayece toch di un fayo di curason.  Un malesa cronico di curazon por tin hopi causa, cual nos no sa ainda kico e ta, y nos no sa di e infeccion tampoco. Pero mester corda cu malesa di delfin ta otro cu pa e ser humano”, señora Giolina Henriquez a señala.