Segun Arthur Giel di Centro di Pesca Hadicurari:
ORANJESTAD (AAN)-- Den entrevista cu Matutino DIARIO, señor Arthur Giel, di Centro di Pesca Hadicurari, a sigui elabora tocante su biahe na Sint Maarten, en ocasion di participa den e DCALFA Conference.
Giel a comenta cu el a trece dilanti cu e kier mira mas produccion, pasobra ora nan a sinta papia y bay cunucunan hunto, nan a haya (na moda di bisa) cu den cierto parti di cunucunan nan mester trece mas produccion.
El a expresa cu nan mester yega na palabracionnan y cumpli cu nan. Nan a compronde for di Hulanda cu nan kier yuda, y a haci peticion na Hulanda, cu ta hopi adelanta den mundo di agricultura y lecheria, pa nan bin hunto y manda material pa e islanan Hulandes Caribense, pa traha nan farmer of e lugar unda nan ta wanta e bestianan, na un manera hopi miho, y pa drenta mas den contacto.
Giel a subraya cu e idea ta pa produci mas cuminda.
“Nos a puntra pa flexibilisa e leynan. E ta un di e prome aspectonan, anto mas seguridad riba lama y e costo halto di e material di pesca cu ketobay ta keda subi, loke ta algo mundial, y nos ta spera di haya un tiki descuento”, Giel a bisa.
El a agrega cu e Islanan mester acerca nan gobiernonan, pa yega na un solucion pa haya descuento di loke nan ta wordo cobra na Aduana pa saca e material cu nan mester. Nan a haci peticion pero no a haya contesta te ainda.
