E tabata sera caba den KIA pa mesun cos
ORANJESTAD (AAN): E homber Venezolano A.L. a presenta dilanti Hues den sala di Corte pa e caso penal cu Ministerio Publico a cuminsa contra dje. E acusacion cu Fiscal a presenta den Corte contra A.L. ta cu riba 11 April 2021 a trafica 10 hende riba boto for di Venezuela.
TRAFICACION DI HENDE
Hues a puntra A.L. si el a trafica hende. Segun A.L. e tabata un ilegal riba e boto pero no a trafica hende. El a bisa Hues cu den pasado el a yega trece ilegal y pesey e ta sera actualmente den KIA. Hues a bisa cu for di e relato di Polis, 11 April 2021 a drenta un boto cu ilegal mas o menos 10’or di anochi. A manda patruya Seroe Colorado caminda Guarda Costa a haya un ilegal banda di e anker grandi na Colony. Segun miembronan di Guarda Costa, e homber aki A.L. tabata riba un boto hunto cu 15 persona cu a yega na santana di cacho.
10 ILEGAL GARA
A haci investigacion y a haya e boto ArcAngel na Baby Beach. A logra gara 10 persona, 7 homber y 3 muher cu tabata scondi den mondi. Personal di Guarda Costa bisa cu 12 April 2021 durante control di celnan a sinti holor fuerte gasoline. Tres di e personanan aki nan plant’i mannan tabata tur sushi mientras cu e otronan si nan mannan tabata limpi. Tur tres a bisa cu nan tambe tabata riba e boto. Un dama a declara cu ora a yega na Baby Beach nan a wordo bisa pa bula na awa y el a hera hoga. Segun e dama nan tabata 15 persona abordo.
ILEGALNAN A BASHA ABAO
El a reconoce un di e potretnan como e persona cu tabata navega e boto. E tabata cambia cu un otro. E persona a reconoce A.L. como un di esnan cu lo tabata navega e boto. El a bisa tambe cu A.L. a yega di cay sera caba pa traficacion di hende. El a bisa cu e ta kere cu A.L. ta doño di e boto, no tabatin salba bida, no tabatin luz. Segun A.L., 5 of 6 no tabatin salba bida bisti. E otronan si. El a bisa cu tur hende mester a bin cu su salba bida. El a bisa cu door di e situacion na Venezuela el a bin Aruba pa traha. A.L. a bisa Hues cu el a paga un primo di dje pa regla e viahe. El a bisa cu e primo tabata para na e boto pa cobra e otronan. Segun A.L., dos primo Carasquero tabata encarga cu e boto y nan tabata sera den e mesun cel cun’e y nan a wordo laga liber. El a bisa cu nan tabata hole gasoline.
Hues a bisa cu tin declaracion Carasquero kende a bisa cu nan tabata 16 persona abordo y no tabatin luz, no GPS y no sa kende tabata navega e boto.
Hues a mustra cu den 2020, A.L. a wordo condena na 4 aña di prison pa traficacion di hende. Tabatin hendenan cu a muri durante e traficacion aki. Un aña despues A.L. atrobe deteni.
EXIGENCIA FISCAL
Fiscal a bisa cu tin dos persona a declara cu ta A.L. ta e capitan di e boto. E ta haya e declaracionnan aki importante. E hendenan a bisa cu nan tabatin miedo cu represaya lo wordo tuma contra nan famia si nan bisa kendenan tabata navega e boto. Fiscal a mustra cu A.L. tabata envolvi den un traficacion caminda hendenan a muri. Ta pesey nan tabatin miedo. Nan por a bisa tambe cu esnan cu tabata navega e boto a huy. Pero nan a tribi di papia. Ademas e man di A.L. tabata sushi. Fiscal ta haya cu A.L. tabata esun cu tabata navega e boto. El a remarca cu awor den Corte, A.L. ta menciona nomber pero no a bisa nada ora el a wordo interoga. Fiscal a señala cu e boto no tabatin luz, no GPS, no suficiente salba bida. E ta haya cu a pone bida di e 15 – 16 hendenan abordo na peliger. E boto no tabata capacita pa transporta asina hopi hende. Danki Dios no tabatin morto. Den pasado si esey a sosode. Hopi hende ta tuma riesgo di cruza laman pa bin busca un mihor bida na Aruba. E trecemento di ilegal no solamente ta viola e ilegalidad sino ta causa hopi trahador ilegal riba Aruba. Fiscal ta haya cu A.L. a yuda cu esaki. E ta considera A.L. como residivista. El a remarca cu apenas A.L. a wordo condena na 4 aña di prison y atrobe e ta organiza traficacion di hende. Fiscal a exigi 1 aña y 8 luna di prison.
ABOGADO
Mr. Griffith a bisa Hues, no tabata A.L. so tabata hole gasoline. No tabata su so tabatin man sushi. Pakico ta persigui A.L. so. Ta 12 persona a wordo deteni. Ta solamente 5 persona a wordo interoga y 2 a bisa cu ta A.L. ta e capitan. E abogado ta haya cu esaki no ta suficiente. El a mustra cu e dama M. ta bisa cu e no conoce ningun hende y con por ta cu e sa cu A.L. tabata sera caba pa traficacion di hende. E abogado ta haya cu esaki tabata informacion cu Guarda Costa a duna pa colga A.L. kende a yega di haya castigo caba. Segun e abogado, tin declaracion cu ta e homber L. y un tal T. ta esnan cu a organiza e viahe. E dama M. a paga e homber L. pa e viahe. E abogado ta haya straño, cu Guarda Costa no a interoga e otronan. Na opinion di e abogado, e dos declaracionnan no ta suficiente pa condena A.L. El a pidi Hues pa declara A.L. liber.
SENTENCIA
Hues a sera tratamento di e caso y dicta sentencia di biaha. Hues ta haya cu A.L. a trece mas cu 12 hende den un boto Aruba. Hues a bisa cu e ta confia den declaracion di e dos personanan, kendenan a bisa cu ta A.L. ta e capitan. Ademas e man di A.L. tabata preto. El a mustra cu e boto no tabatin luz, no tabatin GPS y no ta tur hende tabatin salba bida. Hues ta haya cu a pone bida di e hendenan den peliger. El a bisa cu hendenan ta tuma risico cruza laman grandi y bin traha ilegal na Aruba. Pa cu e castigo, Hues a tene cuenta cu A.L. ta un residivista y ta mas cu 12 hende ilegal el a trece Aruba. Hues a confirma exigencia di Fiscal y a condena A.L. na 1 aña y 8 luna di prison.
