Mientras sistema di formacion di Conseho di Ministro ta continua - *Evelyn Wever-Croes a percura pa un resultado inespera di eleccion
ORANJESTAD(AAN)—E proceso di eleccion ta conoce su punto maximo awe, na momento cu un constelacion nobo di Parlamento bini hunto.
Lo ta trata aki di un constelacion temporal di Parlamento cu ta depende di e formacion di un Conseho di Ministro nobo, cu lo ta encarga cu e trabou ehecutivo di gobernacion di Aruba.
E hecho cu ainda formacion di gobierno nobo no a finalisa, ta haci cu mester papia di un Presidente temporal di Parlamento tambe ya cu e posicion di Presidente y Vice Presidente di Parlamento, tambe ta parti di negociacionnan di un coalicion cu ta den proceso.
E representacion di Pueblo di Aruba den Parlamento di Aruba, ta sigur basa riba un realidad politico, cu a kibra cu e tendencia cu Pueblo no ta vota pa un Gobierno cu a dirigi e pais durante un tempo di crisis, medida y problemanan serio.
Awe por bisa cu Prome Ministro demisarionario Evelyn Wever-Croes a percura pa resultadonan inespera di eleccion, aunke Pueblo a duna tur indicacion cu e sorpresa lo bini den encuestanan oficial y sigur di debatenan politico cu a tuma luga.
Na momento cu Prome Ministro Wever-Croes a duna inicio na su gobernacion, cu un coalicion sumamente peligroso ora ta papia di condicionnan politico cu tabata existi, loke tabata spera como trabou di un bon gobernacion, tabata completamente contra e posibilidad pa e bira un gobernante popular a base di un gobernacion popular.
Su prome paso tabata tuma medida pa evita cu Aruba lo a sink riba tereno financiero, loke ta bon gobernacion pero normalmente no ta wordo aprecia door di votado.
Na un forma unico Prome Ministro Wever-Croes a gana e confiansa di Pueblo di Aruba cu e mester a guia ora economia a wordo destrui dor di Covid-19.
E forma con Reino a duna sosten na Aruba pa medio di e maneho di Wever-Croes, ta sigur impresionante pa no papia mes di elogio di organisacionnan internacional manera IMF.
E resultado di eleccion 2021 sin duda a desvia di e tendencia di votador y a resulta den e sorpresa cu Pueblo di Aruba a eligi Evelyn Wever-Croes como su proximo lider di Gobierno, manera ainda mester wordo confirma den un Gobierno nobo cu Evelyn Wever-Croes cu rason ta bisa mester ta basa riba stabilidad gubernamental.
