Atentado contra periodista Hulandes ta papia di un gran berdad di periodismo - *Investigacion di periodista mester habri wowo di Pueblo pa bienestar general -*Un periodista no por ta mara na ningun hende of causa cu no ta bienestar general
ORANJESTAD(AAN)—Na e momentonan aki na Hulanda un periodista ta lucha pa su bida. Peter de Vries ta un periodista cu a bira conoci pa e forma cu e tabata presenta na comunidad sucesonan den mundo criminal.
Mundo ta sigui loke a pasa cu Peter de Vries, uno di e hopi periodistanan cu a perde nan bida den ehercisio di nan trabou cu ta exigi pa nan pone nan propio interes un banda y sirbi e interes di un comunidad cu mester wordo bon informa di tur desaroyo cu ta afecta un comunidad.
DIARIO sigur ta sigui e desaroyonan di acerca pasobra nan ta mishi directamente cu e trabou cu DIARIO tambe mester eherce y cu ta exigi cu un periodista ta lubida su mes pa e por haci su trabou.
Pa un periodista por cumpli cu Pueblo e mester actua a base di su capacidad riba su tereno profesional cu ta exigi pa e por analisa, procesa, investiga tur loke cay den su man riba e tereno cu e ta traha.
Un periodista ta un peliger directo pa un parti di mundo y humanidad, cu tin secretonan cu nan mester dera pa asina nan por sigui disfruta di loke Pueblo ta brinda nan, sin cu Pueblo ta realisa cu nan ta un peliger pa Pueblo y pa bienestar general.
Un periodista no tin arma pa proteha su mes mientras e ta busca e berdadnan scondi cu mester splica Pueblo kico ta bon y kico ta malo pa Pueblo.
Esaki ta haci cu e trabou di periodismo ta uno peligroso mas ainda pasobra pa e periodista por haci su trabou segun su concenshi y na bienestar di comunidad, e no por acepta regalo ni promesa di ningun hende.
Un periodista mester ta liber cu su concenshi como unico guia y bienestar di tur hende y di e pais su dilanti.
Un periodista ta expone su mes na peliger pasobra e mester investiga, pone luz riba loke kier keda scondi pa asina Pueblo no mira peligernan cu Pueblo no conoce.
Awe sigur DIARIO ta sigui tur loke ta pasa cu Peter de Vries y tur otro periodista na mundo pasobra DIARIO conoce momentonan cu hende ta trata di menasa pa asina stroba trabou di periodismo hasta cu menasa di morto si ta necesario.
Den nos trabou na hopi momento nos mester a pone tur miedo un banda pa sigui cana, sigui traha pa por cumpli cu nos tarea. Haci caso omiso na yamadanan cu ta drenta cu e anuncio cu morto lo cay si no bini cambio.
Situacionnan peligroso mester wordo enfrenta dor di periodistanan cu ta cumpli cu nan tarea y por enfrenta Pueblo cu un concenshi trankil.
Awe nos pensamentonan sigur ta cu Peter de Vries, kende ta duna prueba di e realida di periodismo, e vehiculo cu democracia ta entrega un pueblo descubri berdadnan amargo cu kier keda scondi pa asina alcansa metanan cu no ta na interes di Pueblo.
