ORANJESTAD (AAN) – Den conferencia di prensa, Diahuebs, Minister di Husticia señor Rocco Tjon, a referi na e caso hopi lamentable, di e hoben DJ cu a fayece, dia 17 di October, despues di a cay di e di tres piso di parkeer na Paseo Herencia Mall.
E mandatario a expresa cu e ta trece esaki dilanti, pasobra tin hopi pregunta al respecto. “Ta asina cu Recherche Bureau di Distrito di Noord ta den pleno investigacion pa loke ta e caso aki, y nan tin un team dedica na e investigacion aki.
Obviamente riba e detayenan e no por elabora, pero si e kier pa pueblo sa cu e investigacion ta ‘on going’ y tur informacion pa loke ta e caso aki, por worde presenta atravez di e tip-line cu ta 111-41.
El a agrega cu tur informacion por contribui pa por haya sa kico realmente a sosode, y di e forma aki tambe por trece un clausura pa e famianan.
Tambe relaciona cu e caso aki, e dignatario a bisa cu pa loke ta e admision di famianan di e hoben cu kier bin Aruba, pa por presencia e entiero, na e momento cu e peticion aki a drenta no solamente na su ministerio pero tambe na Ministerio di Integracion bao maneho di minister Glenbert Croes, mesora a tuma contacto cu e familiarnan, y a facilita henter e proceso pa nan por bin Aruba y presencia e entiero.
“Nos a duna nan e tempo necesario tambe, pa e proceso di luto, y despues di esaki obviamente nan lo regresa nan pais”, Minister Rocco Tjon a duna di conoce.
