Conocido empresario di Chalo Burger a fayece inespera na Colombia

ORANJESTAD (AAN): E noticia tristo a drenta Diahuebs, cu e empresario conoci na Aruba y cu ta doño di e.o. e establecimentonan di Chalo Burger y tambe un restaurant churrascaria, a fayece inespera na Colombia.

   Ta trata aki di Gonzalo Antonio Soto, kende ta wordo yama ‘Chalo’ pa tur hende y hopi tabata mir’e como e Colombiano cu semper tin sonrisa riba su cara.  Pero e ta un persona hopi social, gusta combersa, y e tabata uno cu a siña rapido domina e trabao den cushina, for di tempo cu e tabata labora na un churrascaria conoci na Palm Beach.

   Ora cu el a habri su prome snacktrailer conoci como ‘Chalo Burger’, el a hala atencion pa su estilo diferente di cushina un gourmet Hamburger.  Pero tambe el a bira rapidamente conoci pa su Pan cu Hotdog cu ta bin cu un sauce di pineapple cu a haya acogida den par di tempo.  E tabata hasta obtene kavel pa a bende su productonan a lo largo di ruta di Carnaval.

   Su otro hit tambe a bira su fenomenal ‘Salchipapa’ estilo di Cali, cu ademas di e sauce di conoflok, tabata basha su famoso sauce di pineapple tambe riba dje.  Esey ta su cuminda cu a bira viral, y hendenan tabata acudi pa cumpra esey.

   Pero su experiencia trahando den churrascaria, a pone cu el a cuminza bira conoci pa su carni riba grill cu tambe a haya su fanaticonan.

   Chalo Burger a expande cu snacktrailers den diferente bario.  Na 2025, el a habri hasta un churrascaria den Wayaca Falls cu rapidamente a haya clientenan vast.

   Sinembargo como un pashent di diabetes, el a haya cierto complicacion ultimo añanan, y esaki dado momento a afecta su riñon.  Debi na fayo completo di uno, el a logra haya un transplante pa un otro organo y esaki a ser haci na Colombia.  Tur esaki a bay acompaña cu sesionnan di dialisis y demas uzo di remedi anti-rejection.  Pero inespera el a sufri un complicacion di cual Diahuebs merdia el a sucumbi di dje na Medellín.

   Chalo Soto ta bay wordo corda como un amigo di tur hende, y tabata wordo admira door di su empleadonan.  Su famia a indica cu nan lo sigui opera e negoshinan, cumpliendo cu e deseo di Chalo pa semper tin lugarnan exitoso cu ta ofrece cuminda di calidad na clientenan.

   Na su casa, su yiu muhe Valentina, famia y amigonan, DIARIO ta expresa su mas profundo palabra di condolencia.