Fundacion Pa Nos Comunidad
ORANJESTAD (AAN): Den marco di e Common Good Conference di e siman aki, diferente fundacion y instancia local ta comparti con nan ta traha diariamente pa fortalece e bienestar general di comunidad. Un di nan ta Fundacion Pa Nos Comunidad, un fundacion cu ta enfoca riba desaroyo social, colaboracion y proteccion di interesnan comun di nos pueblo.
Segun un representante di e fundacion, e participacion den e Common Good ta representa un oportunidad valioso pa fundacionnan y otro organisacion por mustra con nan ta contribui na comunidad, no solamente den proyecto y operacionnan concreto, pero tambe den construccion di un red fuerte di colaboracion.
“Ta un oportunidad bunita pa nos por mustra na comunidad tur loke nos ta haci pa salvaguardia e bienestar general di nos propio comunidad,” segun nan representante.
Fundacion Pa Nos Comunidad ta destaca cu, pa medio di colaboracion cu un amplio network di diferente organisacion, ta posibel traha hunto pa proteha interesnan general di comunidad y fortalece tanto e sector social como economico. Segun e fundacion, no por mira desaroyo economico separa for di e trabou social cu ta sostene e sociedad.
E fundacion ta mira e conferencia y expo como un espacio unda comunidad, fundacionnan y ciudadano por topa, comparti recurso, y conoce mas riba iniciativanan cu ta existi riba Aruba pa fortalece cohesion social y bienestar colectivo.
“Ora nos traha hunto como comunidad, nos por bira mas fuerte y logra mas pa nos sociedad,” a agrega e representante.
Fundacion Pa Nos Comunidad a uza e oportunidad pa invita e comunidad Arubano pa participa na e Common Good Expo dia 29 di januari y e Common Good Conference dia 30 di januari, cu e meta pa logra un respaldo amplio di comunidad y haci di e iniciativa un proyecto aun mas exitoso pa Aruba.
