Maikel Gomes, vocero City Inspector:
ORANJESTAD (AAN) Den entrevista cu Matutino DIARIO, señor Maikel Gomes, Vocero di Bureau City Inspector, a referi na e autonan bieu cu ta abandona riba caminda na diferente bario.
El a splica cu tin dos aspecto diferente:
- Auto bieu wacharaca, cu ta bieu cu tin hende ta yama na un manera mahos.
- E autonan cu tin number, cu ta core pero ta para riba acera of otro camindanan publico.
“Pero den e caso aki, loke ta autonan bieu ta cay ainda bao di Bureau City Inspector. Si nan tin doño nos por kita nan pero si nan no tin doño eynan e problema ta sinta, y e ta cay directamente den man di KPA, pues, polis tin cu handle e casonan aki”, Maikel Gomes a señala.
El a agrega cu den e ultimo reunion di bario cu el a sinta cu, entre otro, polis di bario, a bin dilanti cu Gobierno ta buscando un tereno, pa un solucion, pa pone e autonan aki riba dje.
“Pero tanten cu no tin esaki, nos no ta wak’e mucho bon y polis tampoco. Polis di un banda, ta man mara pasobra tin hopi auto para, pero no tin unda pa hiba nan. Pues, ta wardando un tereno pa pone e autonan aki. Mi ta corda cu polis a haci limpi den nan luga na Balashi, pa kita e autonan aki, pero e doño ta bay cu ne, por ehemplo, na unda e ta bay pon’e?” Maikel Gomes a señala.
Gomes ta kere cu KPA tambe ta pendiente di loke gobierno a priminti, pa pone e autonan wacharaca aki.
