Pa sigui mehora nan salud y calidad di bida:
ORANJESTAD (AAN) Continuando cu nos entrevista exclusivo cu Chiropractor dr. Renato Van Putten, tocante su Chiropractic Clinic y Club Roy 50 Plus, un parti masha interesante tambe ta cu dr. van Putten despues di algun tratamento ta recomenda ehercicionan cu ta importante pa mantene e curpa sano y den movecion.
Ademas e ta elabora tocante style di bida y su importancia, entre otro nutricion, ehercicio di con canamento no semper ta suficiente, por ehemplo pa personanan adulto mayor, cu ta e centro di su atencion, y di con ta bon pa sigui cu gym specializa pa nan.
“Mas nos subi di edad mas importante e
ehercicio di Resistencia ta bira”, el a expresa. Cu esaki den mente Dr Van Putten a funda Club Roy 50 plus na unda nos grandinan bou guia profesional y aparatonan moderno y sofistica por traha riba un mihor salud y calidad di bida. “Mester bisa cu e programa aki ta un exito y por mira grandinan te hasta 93 aña ta move y sinti
miho; gruponan ta wordo forma y cada ora nan tin klasnan bao guia”, dr. Renato van Putten ta agrega.
Clientenan ta comenta con nan bida y salud a bira miho y nan por keda independiente y feliz. Pa forma parti di e club aki bo mester ta riba 5 añaa y mester por move independiente.
Te unda AZV ta cubri y na unda no: Manera ta conoci AZV a cuminza reconoce Chiropractic como parti di su pakete di servicio medico, tempo di ex-Minister Visser, pero solamente pa trahadornan di Gobierno, cu pa medio di un verwijsbrief di docter di cas, por wordo referi na Chiropractic.
Pero tin un gap, mientras cu semper e necesidad tey, pa loke ta sector priva. Esaki ta un lucha pa e seis Chiropracticnan cu tin na Aruba, y pa e cantidad di pashent cu por rekeri di Chiropractic den e sector priva.
DIARIO kier a gradici Renato van Putten pa a duna nos espacio pa trece dilanti e informacion aki pa nos comunidad ta informa tocante kico Chiropractic ta encera.
