Comunidad satisfecho cu Dia Nacional pa Cuida Aruba

ORANJESTAD (AAN): Dia Nacional pa Cuida Aruba, organiza door di Gobierno di Aruba hunto cu Serlimar,

CEDE Aruba, DOW y diferente partner di sector publico y priva, a reuni ciudadanonan di tur parti di nos isla den un gran accion nacional di limpiesa.

   Cu 26 punto di colecta disponibel rond Aruba, e iniciativa tabatin como meta colecta 100 ton di desperdicio den un solo dia y a logra sobrepasa tur expectativa colectando mas di 211 ton di sushi den un solo dia.

   Na localidadnan manera Santa Cruz, Madiki y cercania di Country Club, ciudadanonan a expresa nan satisfaccion cu e iniciativa. Nan a sali cu entusiasmo pa recoge sushi, limpia nan vecindario y contribui personalmente na un Aruba mas bunita. Segun nan, e actividad tabata un bon proyecto cu mester sigui, preferiblemente un biaha pa luna, pasobra mantene Aruba limpi ta un responsabilidad continuo.

E participantenan a aprecia e facilidadnan cu Gobierno a pone disponibel, specialmente pasobra no tur hende tin transporte of suficiente recurso financiero pa hiba desperdicio grandi na un lugar apropia. E puntonan di colecta y e sosten logistico a duna hopi famia e oportunidad pa deshaci di nan sushi na un manera responsabel.

   Durante e dia tabatin un ambiente di union, cooperacion y amor pa Aruba. Famia, amigo y bisiña a pone man na obra, mientras cu hopi ciudadano a haci un apelacion pa no benta bleki, boter, plastic ni otro desperdicio den mondi, canto di caminda of na lama. Nan mensahe tabata cu Aruba ta un paraiso y cu cada habitante tin e deber di cuid'e.

   Un gradicimento special ta bay na Prome Minister di Aruba, Mike Eman, pa su vision y liderazgo tras di e iniciativa. Su vision di reuni Gobierno, comunidad, empresa, organizacion y boluntario bou di e lema “P'ami. P'abo. Pa nos tur.” a inspira henter pueblo pa tuma responsabilidad comparti pa nos isla.

E ciudadanonan ta spera cu Dia Nacional pa Cuida Aruba no keda un accion di un solo dia. Nan deseo ta pa e proyecto continua regularmente y cu mas hende sigui pone man na obra. E experiencia a demonstra cu, ora Aruba uni, nos por logra un diferencia grandi y duna bon ehempel na e generacionnan cu ta bin.

Aruba ta di nos tur. P'esey, cuida Aruba ta responsabilidad di nos tur.