Comunidad no ta completamente na altura kico tur FAVI ta ofrece

Annemarie Navas, FAVI:

ORANJESTAD (AAN) – Den entrevista cu DIARIO, Annemarie Navas, Ambulante Onderwijskundige Begeleider na Fundacion Arubano pa esnan Visualmente Incapacita (FAVI), a comenta cu den comunidad tin un tabu asina grandi, cu hopi mucha cu tin deficiencia visual no ta yega FAVI.

“Nos tin e suerte cu nos tin bon comunicacion cu scol, door cu ora scol ta señala algo, nos ta pasa cerca dje, y tin casonan unda cu e mayor mes no ta na altura di dje. Pero tin casonan tambe cu ora e mayor ta wordo avisa pa bay FAVI, pasobra su yiu probablemente tin un problema di bista, nan no ta yega cerca nos. Nan ta wak FAVI manera un lugar solamente pa hende grandi y no di mucha. Y nos ta duna servicio na e muchanan tambe. Tur muchanan aki tin derecho, y bo por wak despues compara cu e bida anterior cu e mucha tabata tin, despues di haya su guia e ta bay ta hopi mas exitoso”, Annemarie Navas a señala.

Navas a comenta cu hopi biaha e mucha kier haya bon punto y ta haci su best, pero el a cansa su wowo y na final di dia e tin dolor di cabes, stoma ta bira, e ta sinti tur sort di cos. “Bo por pensa cu e mucha cognitivamente no sa e les, of ta pasobra e no por a wak’e. Por ta el a wak e 3 pero el a kere cu ta un 8 y ate, el a haci fout. Anto tur esey nos ta haci guia y ta analiza ki e mucha tin mester, adapta su bukinan, conseha e docente, haci cambio riba su borchi. Kizas e manera di skirbi mester ta un tiki mas grandi”, Annemarie a indica.

Na lugar di dune cinco of seis blachi pa e lesa na cas FAVI ta grabe p’e y e ta scuche y ta siña di mesun manera. “Pasobra bo por siña lesando, pero scuchando tambe y ta beneficia e mucha hopi mas na e manera aki”, Navas a splica. 

El a comenta cu e comunidad di Aruba no ta completamente na altura di tur loke FAVI tin pa ofrece.